अनुत्पादक क्षेत्रमा जाने कर्जा रोक्न लागि परेका छौँ : गभर्नर अधिकारी

‘बैंकिङ क्षेत्र राष्ट्रिय स्वार्थ र उत्पादन वृद्धिमा केन्द्रित हुनुपर्छ, घुस र मध्यस्थताबिनै ऋण दिनुपर्छ !’

काठमाडौं । नेपाल राष्ट्र बैंकका गभर्नर महाप्रसाद अधिकारीले बैंक तथा वित्तीय क्षेत्रबाट भइरहेको लगानी उत्पादनशील क्षेत्रमा र मुलुकको अर्थतन्त्रलाई योगदान गर्ने क्षेत्रमा जानुपर्ने गरी वित्तीय र मौद्रिक नीति राष्ट्र बैंकले अबलम्बन गरिरहेको बताएका छन् ।

राष्ट्रिय वाणिज्य बैंकले आज शनिबार आयोजना गरेको ‘आरबीबीएल म्यानेजमेन्ट कन्फ्रेन्स २०२४’लाई सम्बोधन गर्दै उनले अनुत्पादक क्षेत्रमा जाने बैंकहरूको कर्जा रोक्न राष्ट्र बैंक लागि परेको र सोही अनुसारको वित्तीय र मौद्रिक नीति अवलम्बन गरिरहेको बताएका हुन् ।

‘बैंकिङ क्षेत्रले ठूलो स्रोत परिचालन गरिरहेको छ । त्यसको दुरुपयोग हुन दिनु भएन । उत्पादनमूलक क्षेत्रमा लगानी होस् र उत्पादन बढोस् । अनुत्पादक क्षेत्रमा कर्जा नजाओस्,’ गभर्नर अधिकारीले भने, ‘राष्ट्रिय स्वार्थमा र उत्पादन वृद्धिमा सहयोग पुग्नेगरी बैंकिङ क्षेत्रले काम गर्नुपर्छ ।’ उत्पादन क्षेत्रमा लगानी बढोस् भनेर नियामकबाट क्षेत्रगत कर्जाको प्रावधान राखिएको गभर्नर अधिकारीले स्पष्ट गरे ।

पछिल्लो समय बैंक तथा वित्तीय संस्थालाई समस्या पर्नेगरी विभिन्न क्षेत्रबाट भइरहेका आक्रमणलाई निस्तेज पार्न बैकिङ क्षेत्रले थप इमानदार र जिम्मेवार भएर काम गर्नुपर्नेमा पनि उनले जोड दिएका छन् । बैंकको सबैभन्दा ठूलो सम्पत्ति भनेको उसले ग्राहकबाट पाउने विश्वास भएको भन्दै गभर्नर अधिकारीले भने, ‘नागरिकको बचत सुरक्षणको दायित्व हामीले लिएका छौँ । हाम्रो इमान्दारी महत्वपूर्ण छ । तपाईहरुले ग्राहकको विश्वास आर्जन गर्नेगरी काम गर्नुहोस् । घुस नदिइकन ऋण पाइँदैन, मध्यस्थता नभइकन ऋण पाइँदैन भनेर आरोप लाग्ने गरेको छ । तर, यस्ता आरोप थप सुन्नु नपरोस् ।’

बैकिङ क्षेत्रका साना कमजोरी र घटनाले पनि बैंकलाई ठूलो समस्या पार्नसक्नेतर्फ उनले सचेत गराएका छन् । यस्तै, दीगो र हरित पूर्वाधारमा लगानी नेपालको प्राथमिकतामा रहेकोमा त्यसलाई बैंक तथा वित्तीय संस्थाले पनि प्राथमिकतामा राखेर कर्जा विस्तार गरिनुपर्ने गभर्नर अधिकारीको भनाइ छ । बैंक तथा वित्तीय संस्थाबाट भइरहेको लगानीले मुलुकको अर्थतन्त्र विस्तारमा ठूलो योगदान गरिरहेको उल्लेख गर्दै उनले आफूले लगानी गर्दा बैंक तथा वित्तीय संस्थाले प्राकृतिक प्रकोप र विपद्का चुनौतीबारे सजग हुनुपर्ने बताए ।