एनसेल फाउण्डेशनसँगको सहकार्यमा सातै प्रदेशमा आईसीटी ज्ञान सम्पन्न

काठमाडौं । आईसीटी फाउण्डेशन नेपाल र एनसेल फाउण्डेशनको संयुक्त सहकार्यमा सातै प्रदेशमा आईसीटी ज्ञान कार्यक्रम सम्पन्न भएको छ ।

सातै प्रदेशमा डिजिटल साक्षरता फैलाउने उद्देश्यले गत जेठ १६ गतेदेखि डिजिटल साक्षरतामूलक कार्यक्रम आईसीटी ज्ञान सुरू भएको थियो ।

सातै प्रदेशका विभिन्न ठाउँमा आयोजना भएको कार्यक्रममा डिजिटल साक्षरता कार्यक्रममा शिक्षक, विद्यार्थी, जनप्रतिनिधि, विज्ञ, स्थानीय लगायत दुई हजार बढीको सहभागिता थियो ।

कार्यक्रम कोशी प्रदेशको मोरङ, मधेसको सर्लाही, बागमतीको दोलाखा, गण्डकीको स्याङ्जा, लुम्बिनीको प्युठान, कर्णालीको सल्यान र सुदूरपश्चिमको कैलालीमा सञ्चालन भएको थियो ।

कार्यक्रममा ओटीपी कोड शेयर गर्न नहुने, जुन पायो त्यही मोबाइल एप चलाउन नहुने, वेबसाइट आधिकारिक हो कि होइन यकिन गर्नुपर्ने, कसैले भनेको वा सोधेको आधारमा आफ्नो विवरण शेयर नगर्ने, फ्री वाइफाइ प्रयोग गरेर डिजिटल कारोबार नगर्ने, विशेष क्यारेक्टरको प्रयोग गरेर सजिलै अनुमान गर्न नसकिने पासवर्ड राख्ने, बेलाबेला पासवर्ड परिवर्तन गर्ने, अकाउन्टहरूमा टू–फ्याक्टर अथेन्टिकेशनको प्रयोग गर्ने, नागरिकता, राष्ट्रिय परिचयपत्र वा अन्य परिचय खुल्ने विवरण सामाजिक सञ्जालमा शेयर नगर्ने, आफ्नो नामको मोबाइल नम्बर प्रयोग गर्ने जस्ता साक्षरता प्रदान गरिएको थियो ।

साक्षरता कार्यक्रममा सहभागी विद्यार्थी, शिक्षक तथा स्थानीय जनप्रतिनिधिहरूले पनि अझै धेरै ठाउँमा यस्ता डिजिटल साक्षरताका कार्यक्रमहरू सञ्चालन गर्न आवश्यक रहेको बताएका थिए ।

प्रविधिको विकास र विस्तारसँगै डिजिटल साक्षरतामा देखिएको खाडललाई कम गर्न एनसेलको सामाजिक उत्तरदायित्व कार्यक्रमअन्तर्गत आईसीटी ज्ञान सञ्चालन गरिएको हो ।

सुगमदेखि गाउँगाउँसम्म डिजिटल साक्षरता फैलाउन प्रदेशस्तरीय कार्यक्रमको रूपमा आयोजना भएको आईसीटी ज्ञानमा साइबर सुरक्षा, डिजिटल टुल, विद्युतीय सुशासन, वित्तीय प्रविधि जस्ता विषयमा विषयविज्ञले साक्षरता प्रदान गरेका थिए भने त्यसको बारेमा अभ्याससमेत गराइएको थियो ।