प्रधानमन्त्री कप महिला क्रिकेट : कोशीले बागमतीलाई हरायो

बैतडी । यहाँ जारी प्रधानमन्त्री कप टी-२० महिला राष्ट्रिय क्रिकेट प्रतियोगिताअन्तर्गत आजदेखि समूह ‘बी’ का खेल सु्रू भएका छन् । समूह ‘बी’ को पहिलो खेलमा कोशी प्रदेशले बागमती प्रदेशलाई १० रनले पराजित गर्दै सुखद् सुरूआत गरेको छ ।

खराब मौसमका कारण १३ ओभरमा छोट्याइएको खेलमा ६४ रनको लक्ष्य पछ्याउने क्रममा बागमती १२ दशमलव एक ओभरमा ५३ रनमा समेटियो । बागमतीका लागि सविका यादवले २० र विपिशा शाहीले अविजित १२ रन बनाइन् ।

कोशीका लागि कप्तान रूबिना क्षेत्री, ज्योति दनुवार र सङ्गीता राईले दुई-दुई विकेट लिए ।

फाप्ला क्रिकेट मैदानमा टस हारेर ब्याटिङको निम्ता पाएको कोशीले निर्धारित १३ ओभरमा सात विकेटको क्षतिमा ६३ रन बनायो । उसका विमला मलाहाले अविजित १९ र कप्तान रूबिना क्षेत्रीले १५ रनको योगदान दिइन् । बागमतीका लागि मनीषा उपाध्यायले ह्याट्रिकसहित चार विकेट हात पारिन् । मनीषा जारी प्रतियोगितामा ह्याट्रिक गर्ने पहिलो खेलाडीसमेत बनिन् ।कोशीकी कप्तान क्षेत्री प्लेयर अफ द म्याच भइन् ।

समूह ‘ए’ बाट एपीएफ र सुदूरपश्चिमले शीर्ष चारमा स्थान बनाइसकेका छन् । यही माघ १ गतेदेखि सुरू प्रतियोगितामा नौ टोलीको सहभागिता छ । प्रतियोगिताको उपाधि विजेतालाई पाँच लाख, दोस्रो हुनेलाई तीन लाख, प्लेयर अफ द सिरिजलाई ५० हजार, उत्कृष्ट ब्याटर र उत्कृष्ट बलरलाई २५-२५ हजार रूपैयाँ पुरस्कार दिइनेछ ।