कोरोनाका कारण नेपाली चलचित्र ‘मनसँग मन’को प्रदर्शन स्थागित

काठमाडौं, चैत १७ –नयाँ वर्षको अवसर पारेर रिलिज गर्ने भनिएको नेपाली चलचित्र ‘मनसँग मन’को प्रदर्शन स्थागित गरिएको छ । कोरोनाको प्रभाव बढेको भन्दै फिल्मको रिलिज स्थगित गर्नुपरेको निर्माण पक्षले जनाएको छ ।भारतमा कोरोनाको महामारी बढेपछि रिलिजको तयारीमा रहेका बलिउडका फिल्मको प्रदर्शन धमाधम स्थगित गर्न थालिएको छ । त्यसको प्रभाव यतिबेला नेपालमा पनि परेको छ ।

नेपालमा कोरोनाको प्रभाव बढ्न थालेको भन्दै सभा समारोह नगर्न र भिडभाडमा नजान अग्रह गरेपछि सरकारले सूचना जारी गरेपछि नेपाली चलचित्र ‘मनसँग मन’को प्रदर्शनको रिलिज स्थगित गर्नुपरेको निर्माण पक्षले जानकारी गराएको छ ।सरकारले हलमा लागू गरेको ५० प्रतिशत अकुपेन्सी पनि हटाएको छैन । अब कोरोनाको संक्रमण कम भएपछि नयाँ मितिका लागि वितरकसँग सल्लाह गरेर घोषणा गर्ने पनि निर्माण पक्षले बताएको छ ।

यो चलचित्रमा पुष्प खड्का, वर्षा सिवाकोटी, बुद्धि तामाङ, चाँदनी प्रधान, महेन्द्र बागदास, सन्ते दालगायतको मुख्य भूमिका छ । यो चलचित्रको एक गीतमा नायक पल शाह र नायिका पूजा शर्माले नृत्य गरेका छन् ।

चलचित्रमा कैलाश राईको निर्देशन, अरुण तामाङको लगानी छ । चलचित्रमा सौरभ लामाको छायांकन, अर्जुन जीसीको सम्पादन, अर्जुन पोखरेल, दीपक शर्मा र अगोम गुरुङको संगीत, कमल राई र रामजी लामिछानेको नृत्य निर्देशन, सन्तोष खवासको एक्सन छ ।

यो चलचित्रको प्रदर्शन स्थगित गरिए पनि यसको फस्ट लुकका रूपमा पोस्टर सार्वजनिक गरिएको छ । फस्टलुकमा मुख्य कलाकार पुष्प खड्का र वर्षा सिवाकोटीलाई रोमान्टिक रूपमा उतारिएको छ ।