नेपाल पुनर्बीमा कम्पनीको लाभांश सुरक्षित गर्नुभयो त ?

काठमाडौं । नेपाल पुनर्बीमा कम्पनीको लाभांश सुरक्षित गर्ने मंगलबार अन्तिम दिन रहेको छ ।

कम्पनीले साधारणसभा तथा लाभांश वितरणका लागि १४ पुसमा बुक क्लोज गर्दै छ । यस अनुसार नेप्सेमा मंगलबारसम्म कायम रहने सेयरधनीले कम्पनीको साधारणसभामा भाग लिन सक्नेछन् ।

कम्पनीले आर्थिक वर्ष २०७६/०७७ को नाफाबाट लगानीकर्तालाई १६ दशमलव ५० प्रतिशत बोनस सेयर र कर प्रयोजनसहित दुई दशमलव ५० प्रतिशत नगद लाभांश वितरण गर्ने प्रस्ताव पारित गर्न २२ पुसमा साधारणसभा बोलाएको छ । सभा कार्की ब्यांकेट बबरमहल काठमाडौंमा बिहान ११ बजे सुरु हुनेछ ।

सभामा नियमावली संशोधन गर्ने, आर्थिक वर्ष २०७६/०७७ को वासलात, नाफा–नोक्सान र नगद प्रवाहमाथि छलफल हुनेछ । त्यस्तै, आर्थिक वर्ष २०७७/०७८ का लागि लेखापरीक्षक नियुक्त गरी पारिश्रमिक निर्धारण गर्ने लगायतका एजेन्डा छन् ।