प्रधानमन्त्री कप क्रिकेट छनोट: बैतडीको विजयी सुरुआत

काठमाडौँ । ‘प्रधानमन्त्री कप’ एक दिवसीय क्रिकेट प्रतियोजितताअन्तर्गत सुदूरपश्चिम प्रदेशस्तरीय छनोटमा बैतडीले विजयी सुरुआत गरेको छ । मङ्गलवार भएको खेलमा बैतडीले बझाङलाई छ विकेटले पराजित गर्दै विजयी सुरुआत गरेको हो ।

बझाङले दिएको १२२ रनको लक्ष्य बैतडीले १७ ओभरमा ४ विकेट गुमाउँदै भेट्टायो । जसमा दीपक बोहराले ४८, खडक बोहराले २६ र वीरेन्द्र नाथले नटआउट २४ रनको योगदान गरे । बझाङका अनिल थापाले तीन र सुशील रावलले एक विकेट  लिए । त्यसअघि पहिला ब्याटिङ गरेको बझाङ ३८ ओभरमा १२१ रनमा अलआउट भयो । उसका गजेन्द्र भण्डारीले २९ र अनिल थापाले २५ रन बनाए । बैतडीका खडक बोहराले तीन, वसन्त खत्री र हिक्मत महराले दुई÷दुई विकेट झारे । नेपाल क्रिकेट सङ्घ (क्यान) को आयोजनामा प्रधानमन्त्री कप एक दिवसीय क्रिकेट प्रतियोगिता कात्तिक १२ गतेदेखि काठमाडौँमा हुँदै छ ।