१ महिनामा ५७६ कराेडले बढ्याे विदेशी विनिमय सञ्चिति, साढे ९ महिनाको आयात धान्न पुग्ने

काठमाडाैं । चालु आर्थिक वर्ष २०७९/८० काे तेस्राे महिना (असाेज) मा विदेशी विनिमय सञ्चितिमा सुधार आएकाे छ । नेपाल राष्ट्र बैंकले जारी गरेकाे तथ्यांक अनुसार असाेज महिनाकाे मसान्तमा विदेशी विनिमय सञ्चिति १२४६ अर्ब २२ करोड रूपैयाँ पुगेको छ ।

भदाै महिनाकाे मसान्तमा कुल ११८९ अर्ब १६ करोड रूपैयाँ रहेकाे विदेशी विनिमय सञ्चिति एक महिनामा ५७ अर्ब ६ कराेड रूपैयाँले बढेर १२४६ अर्ब २२ करोड रूपैयाँ पुगेकाे हाे ।

अमेरिकी डलरमा भने यस्तो सञ्चिति २०७९ असोज मसान्तमा ९ अर्ब ४८ करोड रहेकाे छ ।

कुल विदेशी विनिमय सञ्चितिमध्ये नेपाल राष्ट्र बैंकमा रहेको सञ्चिति २०७९ असोज मसान्तमा ११०१ अर्ब ६० करोड पुगेको छ । त्यसैगरी बैंक तथा वित्तीय संस्था (नेपाल राष्ट्र बैंकबाहेक) सँग रहेको विदेशी विनिमय सञ्चिति २०७९ असोज मसान्तमा १४४ अर्ब ६२ करोड रहेको छ । २०७९ असोज मसान्तको कुल विदेशी विनिमय सञ्चितिमा भारतीय मुद्राको अंश २३.८ प्रतिशत रहेको राष्ट्र बैंककाे तथ्यांकमा उल्लेख छ ।

राष्ट्र बैंकका अनुसार आर्थिक वर्ष २०७९/८० को ३ महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चिति ९.६ महिनाको वस्तु आयात र ८.३ महिनाको वस्तु तथा सेवा आयात धान्न पर्याप्त रहने देखिन्छ ।

२०७९ असोज मसान्तमा विदेशी विनिमय सञ्चितिको कुल गार्हस्थ्य उत्पादन, कुल आयात र विस्तृत मुद्राप्रदायसँगका अनुपातहरु क्रमशः २५.७ प्रतिशत, ६९.५ प्रतिशत र २२.५ प्रतिशत रहेका छन्। २०७९ भदाै मसान्तमा यी अनुपातहरु अनुपातहरु क्रमशः २४.५ प्रतिशत, ६४.६ प्रतिशत र २१.८ प्रतिशत रहेकाे थियाे।