गठबन्धनमभित्र ‘पावर सेयरिङ’ बैठक तीब्र

काठमाडौं । आमनिर्वाचन परिणाम आउँदै गर्दा राजनीतिक दौडधुप झनै तीव्र हुन थालेको छ । सत्ता गठबन्धनभित्र प्रधानमन्त्रीदेखि राष्ट्रपति, उपराष्ट्रपति, सभामुख र उपसभामुख चयन प्रक्रियासमेत अघि बढाउने तयारी भएको छ ।

नयाँ जनादेशअनुसार पहिले नयाँ सरकार गठन गर्नुपर्ने भएपछि गठबन्धन आबद्धलगायत दल ‘सत्ता जोडघटाउ’मा लागिसकेका छन् । जोडघटाउमा नयाँ प्रधानमन्त्रीदेखि राष्ट्रपति चयनसम्मका विषय जोडिएका छन् । परिणामअनुसार संसद्मा कुनै पनि दलको ‘एकल बहुमत’ नपुग्ने पक्का भएपछि बहुमतीय आधारमा सरकार गठन प्रक्रिया अघि बढ्नेछ ।

प्रधानमन्त्रीको सरकारी निवास बालुवाटारमा सोमबार प्रधानमन्त्री तथा नेपाली कांग्रेस सभापति शेरबहादुर देउवाले नेकपा माओवादी केन्द्र अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादी अध्यक्ष माधवकुमार नेपालसँग नयाँ राजनीतिक कोर्सको छलफल गरेका छन् ।

त्यसक्रममा सरकार गठनदेखि राष्ट्रपति चयनसम्मको विषयमा छलफल भएको हो । प्रधानमन्त्रीका प्रेस सल्लाहकार गोविन्द परियारका अनुसार देउवाले दुवै दलका अध्यक्षसँग नयाँ राजनीतिक कोर्स र गठबन्धनको निरन्तरतामा छलफल गरेका छन् । नयाँ राजनीतिक कोर्स, गठबन्धनलाई इन्ट्याकमै राखेर सरकार गठन र पावर सेयरिङबाटै अघि बढ्ने विषयमा छलफल भएको आजको राजधानी दैनिकमा समाचार छ ।