माइतीघर मण्डलामा चर्को ब्याजदरविरुद्ध उद्योगी-व्यवसायीको प्रदर्शन

काठमाडौं । आइतबार माइतीघर मण्डलामा भेला भएर उद्योगी तथा व्यवसायीहरुले बैंक तथा वित्तीय संस्थाको चर्को ब्याजदरविरुद्ध आन्दोलन गरेका हुन् ।

आन्दोलनका क्रममा बोल्दै नेपाल राष्ट्रिय व्यवसायी महासंघका संस्थापक अध्यक्ष नरेश कटुवालले शान्तिपूर्ण आन्दोलन गर्दा सरकार र राष्ट्र बैंकले बेवास्ता गरेकाले अहिले पुनः आन्दोलन गर्नुपरेको बताए।

उनले भने, ‘माघ १६ गते उद्योगी, व्यवसायी मिलेर बृहत आन्दोलन गरेको थियौं । तर, सरकारले बोलाएर छलफल गरेन । त्यसैले पुनः आन्दोलन गरेका थियौं । तर, पनि सरकारले ध्यान नदिएपछि बैंक वित्तीय संस्थाको दादागिरीविरुद्ध हामीले आन्दोलन गरेका हौं।’

उनले सरकारले व्यवसायीहरुका माग सम्बोधन नगरे झनै विकराल अवस्था आउने र राष्ट्र बैंक र संसद् भवन घेराउ गर्ने चेतावनी दिए ।

उनीहरुले मौद्रिक नीति परिमार्जन गर, ब्याज दरमा स्थिरता कायम गर, चालु पुँजी निर्देशिका स्थगित गर, ब्याजदर हामीलाई चर्को भयो, उच्च सेवा शुल्क बन्द गर लगायतका प्ले कार्ड बोकेर आन्दोलन गरेका थिए ।