आजदेखि एमडीएमएस प्रणाली लागु, गैरकानुनी रुपमा भित्रिएका मोबाइल बन्द हुने

काठमाडौं । नेपाल दूरसञ्चार प्राधिकरणले सोमबार (आज) बाट मोबाइल डिभाइस म्यानेजमेन्ट सिस्टम (एमडीएमएस) लागु गर्ने भएको छ ।

अवैध तथा गैरकानुनी रुपमा मोबाइल फोनहरु नभित्रिउन् भनेर एमडीएमएस प्रणाली नेपालमा कार्यान्वयनमा ल्याएको जनाइएको छ । एमडीएमएस लागु भएसँगै दर्ता नभएका तथा अवैध र गैरकानुनी रुपमा भित्रिएका मोबाइलहरु चल्न बन्द हुनेछन् ।

दूरसञ्चार प्राधिकरणकाअनुसार एमडीएमएस प्रणाली लागु भएसँगै दर्ता नभएका मोबाइल फोनहरुमा नेपालमा चल्ने छैनन् । प्राधिकरणले कात्तिक १९ गतेसम्मको समयसिमा तोक्दै एमडीएमएस प्रणालीमा फोनहरु दर्ता गर्न भनेको थियो । अब दर्ता नभएका फोनहरुमा सिम कार्ड नचल्ने तथा मोबाइल दूरसञ्चार सेवा अवरुद्ध हुने प्राधिकरणले जनाएको छ ।

एमडीएमएस कार्यान्वयनमा आएसँगै आईफोन, स्यामसंग, वानप्लसजस्ता फोनहरु दर्ता नभएको भए सिम चल्दैनन् । प्राधिकरणले दैनिक रुपमा प्रणालीमा दर्ता नभएका फोनहरुलाई ब्लक गर्दै जाने जनाएको छ ।

प्रयोगकर्ताले आफ्नो फोन एमडीएमएसमा दर्ता भएको छ/छैन भनेर हेर्नका लागि भने एमडीएमएस प्रणालीको आधिकारिक वेबसाईटमा फोनको आईएमईआई नम्बर राखेर हेर्न सक्नेछन् ।

आफ्नो फोन एमडिएमएसमा दर्ता भएको छ वा छैन भन्ने एमडिएमएसको आधिकारिक पोर्टल https://mdms.nta.gov.np/ मा गएर हेर्न सकिन्छ। यसका लागि आवश्यक मोबाइलको आइएमइआई नम्बर किप्याडमा गएर *#०६# डायल गरेर पत्ता लगाउन सकिन्छ।