भारतको केरलामा पनि कोरोना: तीन हजार बढी चिकित्सकको निगरानीमा

काठमाडौं,माघ २७- कोरोना भाइरसको सङ्क्रमणको आशङ्का गर्दै भारतको केरला राज्यको स्वास्थ्य विभागले तीन हजार दुई सय ५२ जनालाई निगरानीमा राखेको छ ।

विभागले तीमध्ये ३४ जनालाई अस्पतालमा भर्ना गरिएको जनाएको छ । विभागले तीन सय ४५ जनाको रगतको नमुना परीक्षण गर्दा तीन सय २६ जनामा कोरोना भाइरसको सङ्क्रमण नदेखिएको बताएको हो ।

विभागले जारी गरेको विज्ञप्तिमा भनिएको छ,‘चीनबाट फर्किएका व्यक्तिको रक्त परीक्षण गर्दा कोरोना भाइरसको सङ्क्रमण देखिएन र अनुगमनमा राखिएका व्यक्तिको रक्त परीक्षणको रिपोर्ट आउन बाँकी रहेको छ ।’

विज्ञप्तिमा चीनबाट फर्किएका व्यक्तिहरुलाई १८ दिनसम्म घरबाहिर हिँडडुल नगर्न सल्लाह दिइएको र त्यसपछि नजिकको स्वास्थ्य केन्द्रमा जँचाउन भनिएको उल्लेख छ ।

थ्रिसुरमा रहेको सरकारी शिक्षण अस्पतालको विशेष वार्डमा राखिएका चीनबाट फर्किएका विद्यार्थीको प्रयोगशाला परीक्षण गर्दा कोरोना भाइरस(एन्कोभ) को सङ्क्रमण नदेखिएको अस्पतालले जनाएको छ ।