अमेरिकामा नेपाली छात्रा मुना पाण्डेको हत्या आरोपमा बबिसिंह शाह पक्राउ

वाशिङ्टन डीसी (अमेरिका ) । प्रहरीले नेपाली विद्यार्थी २१ वर्षीया मुना पाण्डेको हत्या अभियोगमा टेक्सास राज्यबाट ५१ वर्षीय बबिसिंह शाहलाई पक्राउ गरेको छ ।

पाण्डेको टेक्सासको हयुस्टनमा गत शनिबार हत्या भएको थियो । स्थानीय प्रहरीले उनको हत्या अभियोगमा शाहलाई पक्राउ गरी तस्बिरसमेत सार्वजनिक गरेको हो ।

हयुस्टन पुलिस डिपार्टमेन्टले ६३६३ वेष्ट एयरपोर्ट ब्लुवर्डमा गत सोमबार साँझ ५:३५ बजे पाण्डेको शव उनकै अपार्टमेन्टमा फेला पारेको थियो । प्रहरीलाई अपार्टमेन्टको स्टाफले फोन गरेर जानकारी दिएको र सोही जानकारीका आधारमा अपार्टमेन्टमा प्रहरी टोली सोमबार पुगेका जनाइएको छ ।

त्यहाँ उनीहरूले गोली प्रहारपश्चात मृत्यु भएकी एक युवतीको शव बरामद गरेका थिए । पछि उनीहरूले सो शव पाण्डेको भएको पुष्टि गरेका थिए ।

प्रहरीले बुधबार मात्र शङ्कास्पद व्यक्तिको तस्बिर सार्वजनिक गरेको थियो । सोही दिन साँझ संदिग्ध शाहलाई प्रहरीले गिरफ्तार गरेको थियो ।

नेपाली समुदायका अगुवाहरूले मुनाको न्यायका लागि प्रयास गरिरहने भन्दै संदिग्ध व्यक्तिलाई अधिकतम सजायको माग गरेका छन् ।