हो, मसँग ग्लक अर्धस्वचालित पिस्तोल छ : कमला ह्यारिस

राष्ट्रपति पदकी डेमोक्र्याटिक उम्मेदवार कमला ह्यारिसले सोमबार प्रसारित एक अन्तरवार्तामा उनीसँग ग्लक अर्धस्वचािलत पिस्तोल रहेको खुलासा गरेकी छन् । उनले यसलाई सुटिङ रेन्जमा चलाएको बताइन् ।

अमेरिकी उपराष्ट्रपतिको हतियार रोजाइबारे अटकलबाजी चलिरहँदा उनले हालै टेलिभिजन स्टार ओप्रा विन्फ्रेलाई आफूसँग बन्दुक रहेको र आफ्नो घरमा कोही चोर पसेमा गोली हान्ने बताएकी थिइन् ।

‘मसँग एउटा ग्लक धेरै समयदेखि छ,’ प्राइमटाइम सीबीएस सो ६० मिनेटमा अन्तरवार्ता दिने क्रममा कस्तो किसिमको बन्दुक छ भनेर सोधिएको प्रश्नमा पूर्वअभियोजक एवं क्यालिफोर्नियाकी पूर्वमहानायाधिवक्ता ह्यारिसले भनिन्, ‘मेरो पृष्ठभूमि कानुन प्रवर्तनमा छ र त्यसैले त्यहाँ तपाईँको जवाफ छ ।’

अन्तरवार्ताकार बिल ह्विटाकरले त्यसपछि उनलाई कहिल्यै ग्लक चलाउनुभएको छ भनेर सोधे । उनले हाँस्दै जवाफ दिइन्, ‘निश्चय नै मैले सुटिङ रेन्जमा चलाएकी छु ।’

अस्ट्रियाली निर्माता ग्लकले अमेरिकाको सबैभन्दा बढी बिक्री हुने ह्यान्डगनहरूमध्ये एक बनाउँछ । प्रहरीले व्यापक रूपमा प्रयोग गर्ने ग्लकले आफ्नो उपस्थितिका कारण चलचित्र र हिपहप संस्कृतिमा लोकप्रियता पाएको छ ।

ह्यारिसको डेमोक्र्याटिक पार्टीले नियमित रूपमा सशस्त्र अपराध र ठूलो मात्रामा गोलीकाण्डले प्रभावित अमेरिकामा बन्दुकको पहुँच कटौती गर्ने कुरामा जोड दिइरहेका बेला अहिलेसम्म ह्यारिसले आफूसँग बन्दुक रहेको कुरा बिरलै उल्लेख गरेकी थिइन् ।

यद्यपि, रिपब्लिकन उम्मेदवार डोनाल्ड ट्रम्पसँगको कडा निर्वाचनमा ५९ वर्षीया डेमोक्र्याट ह्यारिसले आफ्नो बन्दुकधारकको योग्यता देखाउन थालेकी छन् ।

ह्यारिसले अमेरिकी संविधानको दोस्रो संशोधनको उल्लङ्घन गर्दै अमेरिकीहरूको बन्दुक जफत गर्न चाहेका ट्रम्पले बारम्बार दाबी गर्दै आएकी छन् । गत महिना भएको उनीहरूबीचको एउटा मात्र टेलिभिजन बहसमा पनि ट्रम्पले यो कुरा दोहोर्‍याएका छन् ।

आफू र आफ्नो उपराष्ट्रपति उम्मेदवार टिम वाल्ज दुवै बन्दुकधारक रहेको उल्लेख गर्दै ह्यारिसले उक्त आरोपलाई जोडदार रूपमा अस्वीकार गरिन् । ‘म बन्दुक मालिक हुँ,’ उनले सेप्टेम्बरमा विन्फ्रेसँग हाँस्दै भनिन्, ‘यदि कोही मेरो घरमा प्रवेश गर्छ भने उसलाई गोली लाग्नेछ ।’

आप्रवासन र अर्थतन्त्रजस्ता संवेदनशील विषयहरूमा सावधानीपूर्वक कठिन प्रश्नहरूको सामना गर्ने ह्यारिसको अन्तरवार्तामा ग्लक खुलासा सबैभन्दा आकर्षक विषय थियो ।