मारिएका त छैनन् इरानका सर्वोच्च नेता खामेनी ?

इरानका सर्वोच्च नेता आयतोल्लाह खामेनी पछिल्लो एक हप्तादेखि सार्वजनिक रूपमा देखिएका छैनन्

काठमाडौं । इजरायल र इरानबीच युद्धविराम भएको तीन दिन बितिसक्यो, तर अहिले इरानका सर्वोच्च नेता कहाँ छन् ? भन्ने प्रश्न उठेको छ ।

इरानका सर्वोच्च नेता आयतोल्लाह खामेनी पछिल्लो एक हप्तादेखि सार्वजनिक रूपमा देखिएका छैनन्, त्यसपछि उनी सुरक्षित छन् कि छैनन् भन्ने अड्कलबाजी सरू भएको छ ।

न्यूयोर्क टाइम्सको रिपोर्टअनुसार इरानको सरकारी टेलिभिजनमा खामेनीको कार्यालयका एक अधिकारीलाई यही प्रश्न सोधिएको थियो । टीभी होस्टले अधिकारीलाई भने, ‘मानिसहरू सर्वोच्च नेताको बारेमा धेरै चिन्तित छन्, के तपाईं हामीलाई बताउन सक्नुहुन्छ कि उहाँ कस्तो हुनुहुन्छ ?’

खामेनीको अभिलेख कार्यालयका प्रमुख मेहदी फजाएलीले यसको प्रत्यक्ष जवाफ दिएनन् । बरु उनले भने, ‘हामी सबैले प्रार्थना गर्नुपर्छ कि सर्वोच्च नेताको सुरक्षाको लागि जिम्मेवार व्यक्तिहरूले आफ्नो काम राम्रोसँग गरिरहेका छन् ।’

आइतबार अमेरिकाले इरानको तीन आणविक भट्टीमा बम विस्फोट गरायो, जसको जवाफमा इरानले कतारमा रहेको अमेरिकी अड्डामा मिसाइल प्रहार गर्‍यो । त्यसपछि इरान र इजरायलले युद्धविराममा सहमति जनाए, जुन मङ्गलबार बिहानदेखि लागू भयो । यी सबैको क्रममा इरानी अधिकारीहरूले खामेनी बङ्करमा लुकेर बसेको र इलेक्ट्रोनिक सञ्चार प्रयोग नगरेको बताइएको छ । उनले कुनै वक्तव्य वा रेकर्ड गरिएको सन्देश पनि जारी गरेका छैनन् ।

तर, सर्वोच्च नेताको अनुपस्थितिले इरानी जनतालाई आश्चर्यचकित र असहज बनाएको छ । सरकारी अधिकारीहरूले हालैका दिनहरूमा खामेनीलाई नभेटेको वा कुरा नगरेको चर्चा छ ।

उनीहरूको मौनताले खामेनी हालैका निर्णयहरूमा संलग्न छन् या छैनन् भन्ने अड्कलबाजी सुरू भएको छ ।

उनले अहिले देशको निगरानी गरिरहेका छन् या छैनन्, के उनी घाइते, बिरामी वा जीवित छन् ? भन्ने प्रश्न उठेको छ ।

न्यूयोर्क टाइम्सले राजनीतिक विश्लेषक र खामेनीका शीर्ष सल्लाहकार जनरल याह्या सफावीका छोरा हमजा सफावीलाई उद्धृत गर्दै भनेको छ, ‘इरानी सुरक्षा अधिकारीहरू युद्धविरामको समयमा पनि इजरायलले खामेनीको हत्या गर्ने प्रयास गर्न सक्ने विश्वास गर्छन् ।’ त्यसैले, बाहिरी संसारसँग सीमित सम्पर्क र उनको लागि चरम सुरक्षा प्रोटोकलहरू लागू गरिएको बताइएको छ ।

खामेनीले सुरक्षित ठाउँमा बसेर महत्त्वपूर्ण निर्णय लिइरहेको बताइएको छ, तर खामेनी समर्थकहरू यसबाट सन्तुष्ट देखिँदैनन् । उनीहरूले सामाजिक सञ्जालमा लेखिरहेका छन् कि सर्वोच्च नेतालाई नदेखेसम्म वा नसुनेसम्म इरानले इजरायलविरुद्धको युद्धमा विजयी भएको महसुस गर्न सकिरहेका छैनन् ।