हङकङमा भएको आगलागीमा मृत्यु हुनेको सङ्ख्या १२८ पुग्यो

काठमाडौं । विश्वको अग्रणी वित्तीय केन्द्रहरूमध्ये एक हङकङ आफ्नो इतिहासकै सबैभन्दा ठूलो आगलागीसँग जुधिरहेको छ । अहिलेसम्म १२८ जनाको मृत्यु भइसकेको छ र बेपत्ताको सङ्ख्या अझै स्पष्ट छैन ।

आगलागीले आवासीय ब्लकका धेरै भवनहरूलाई सखाप पारेको छ । बुधबार सुरू भएको आगलागीपछि अहिले पनि कैयौं फ्ल्याटमा आगो बलिरहेको बताइएको छ ।

आगलागीमा ७९ जना घाइते भएका छन्, जसमध्ये धेरैको अवस्था गम्भीर छ । बुधबार दिउँसो स्थानीय समयअनुसार २ः५० बजेतिर हङकङका आवासीय भवनहरूमा आगो लागेको थियो । कम्प्लेक्समा आठ टावरहरू छन्, जसमा लगभग २००० अपार्टमेन्टहरू छन् । आगलागी सुरू भएको पाँच मिनेटमै ३२ तालासम्म फैलिएको थियो ।

केही निर्माण कार्य भइरहेको थियो र भवन वरिपरि बाँसको मचान खडा गरिएको थियो । यसले गर्दा आगो द्रुत गतिमा फैलिएको बताइएको छ ।

प्रहरी अनुसन्धानले आवासीय भवनहरूमा प्रयोग हुने सुरक्षा जाली, वाटरप्रुफ क्यानभास र प्लास्टिकका पानाहरूले पनि ब्लकभरि आगो द्रुत गतिमा फैलिन योगदान पुर्‍याएको खुलासा गरेको छ ।

यसका साथै, झ्यालहरू बन्द गर्न प्रयोग गरिने अत्यधिक ज्वलनशील पोलियुरेथेन फोमले पनि आगो फैलिनमा योगदान पुर्‍याएको पाइएको छ । प्रहरीले आगलागीको सम्बन्धमा निर्माण कम्पनीका निर्देशक र परामर्शदाता सहित तीन जनालाई पक्राउ गरेको छ ।

अधिकारीहरूले ठूलो आगलागीबाट प्रभावित हङकङ परिसर वाङ फुक कोर्टको मर्मतसम्भारसँग सम्बन्धित ‘सम्भावित भ्रष्टाचार’को अनुसन्धान गरिरहेका छन् । हङकङको वैधानिक भ्रष्टाचारविरोधी निकाय, भ्रष्टाचारविरुद्धको स्वतन्त्र आयोगले यस विषयमा उल्लेखनीय सार्वजनिक चासोलाई ध्यानमा राख्दै अनुसन्धान गर्न कार्यदल गठन गरेको जानकारी दिएको छ ।