सरकार चुनावमा धेरै पैसा खर्च गर्ने प्रवृत्ति नियन्त्रण गर्ने योजनासहित अगाडि बढेको छः प्रधानमन्त्री कार्की

काठमाडौं । प्रधानमन्त्री सुशीला कार्कीले राष्ट्रिय मुद्दामा सबै पक्ष एक हुनुपर्नेमा जोड दिएकी छिन् ।

प्रधानमन्त्री निवास बालुवाटारमा शनिबार भएको राष्ट्रिय प्रजातन्त्र पार्टीका अध्यक्ष राजेन्द्र लिङ्देन नेतृत्वको प्रतिनिधिमण्डलसँगको छलफलमा उनले राष्ट्रिय मुद्दामा सबै पक्ष एक हुनुपर्ने र सुधारका लागि सहकार्य जरुरी रहेको बताइन् ।

प्रधानमन्त्री कार्कीले विगतमा विभिन्न नाममा झगडा र विमति राख्दा धेरै क्षति बेहार्नु परेको उल्लेख गर्दै अब थप गुमाउने अवस्था आउन नदिन सबै संयमित भएर अगाडि बढ्नुपर्नेमा जोड दिनुभएको उनका प्रेस संयोजक रामबहादुर रावतले जानकारी दिए ।

उनले भने, “नयाँ नयाँ समस्या मात्रै ल्याउनेभन्दा पनि देशमा प्राप्त उपलब्धिलाई जोगाउँदै अगाडि बढ्नुपर्ने आवश्यकता छ । समस्या मात्रै तेस्र्याएर होइन, सम्हालिएर हिँडौँ । विमतिका कुरा छन्भने आफ्ना मत लिएर जनतामा जाऔँ । जनताबाट अनुमोदित भएर आफ्ना एजेन्डा लागू गरौँ ।”

प्रधानमन्त्री कार्कीले आफ्ना लागि र सरकारका लागि कोही आफन्त–पराया नभएको उल्लेख गर्दै कुनै पनि कारणले कसैलाई पनि विभेद नगर्ने प्रतिबद्धता व्यक्त गरे । उनले भने, “तपाईंहरु र अरू जोकोहीले दिने सुझाव सम्मानसाथ ग्रहण गर्छौं । भ्रष्टाचार प्रकरणका थाती रहेका धेरै मुद्दा अगाडि बढेका छन् । यस मामिलामा पनि चुप लागेर बस्दैनौँ । मुलुकको वातावरण बिगार्न धेरै लागेका छन्, यसैमा अल्झिने हो भने देश कहिल्यै उँभो लाग्दैन । त्यसैले सरकार सम्हालिएर अगाडि बढ्छ ।”

प्रधानमन्त्री कार्कीले दण्डहीनतालाई प्रश्रय दिए राम्रो नहुने र यसपालि त्यस्तो हुन नदिने बताए । “निर्दोष बालबालिका सडकमा हिँड्दाहिँड्दै मारिएका छन् । यस विषयमा छानबिन आयोगको प्रतिवेदनमा जे सिफारिस आउँछ, त्यो कार्यान्वयन हुन्छ”, उनले भने ।

सरकार चुनावमा जति पनि पैसा खर्च गर्ने प्रवृत्ति नियन्त्रण गर्न लागेका बताउँदै उहाँल स्वच्छ चुनावका लागि मितव्ययी ढङ्गले अगाडि बढ्न राप्रपालगायत सबैलाई आग्रह गरे ।