एमालेको महाधिवेशन : नेतृत्व चयनका लागि ४ बजेदेखि मतदान, विद्युतीय मेसिन प्रयोग गरिँदै

काठमाडौं । नेकपा एमालेको नयाँ नेतृत्व चयनका लागि आज अपराह्न ४ बजेदेखि मतदान सुरू हुने भएको छ ।

केन्द्रीय निर्वाचन आयोगले ४ बजेदेखि मतदान शुरु हुने जानकारी दिएको हो ।

यस अघि १ बजेदेखि मतदान शुरु हुने भनिएको थियो । आयोगले विद्युतीय मतदान मेसिनमा उम्मेदवारको नाम सेटिंग गरी परीक्षण गर्न समय लागेकाले ४ बजेदेखि मात्र मतदान सुरू हुने बताएको छ ।

आयोगले मतदानमा ८० मेसिनको प्रयोग गरिरहेको जानकारी दिएको छ भने १० मेसिन ब्याकअपमा हुने र ५ वटा मेसिन मतदानको अभ्यासका लागि राखिएको आयोगले जनाएको छ ।

क्लस्टर अनुसार मतदान गर्नुपर्ने हुनाले एक प्रतिनिधिलाई मतदान गर्न २० देखि २५ मिनेटको समय लाग्ने बताइएको छ ।

यस अनुसार २ हजार २६२ मतदाताले मतदान गर्न करिब ७ घण्टा लाग्ने देखिएको छ । एमालेको नयाँ नेतृत्वका लागि पदाधिकारीसहित ३०१ पदका लागि ६०३ उम्मेदवार रहेका छन् ।