बिहीबार, माघ २९, २०८२
कर्पोरट खबर
4:04 pm, बिहीबार, माघ २९, २०८२
काठमाडौँ । रुसले म्यासेजिङ एपहरूमा कडाइ बढाइरहेको बेला व्हाट्सएपले रुसमाथि देशभित्र एपलाई पूर्ण रूपमा ब्लक गर्ने प्रयास गरेको आरोप लगाएको छ ।
मेटाको स्वामित्वमा रहेको व्हाट्सएपले जारी गरेको विज्ञप्तिमा उक्त कदमको उद्देश्य रुसमा रहेका आफ्ना १० करोडभन्दा बढी प्रयोगकर्तालाई सरकार नियन्त्रित निगरानी एप तर्फ धकेल्नु रहेको दाबी गरिएको छ ।
मेटाले १० करोडभन्दा बढी प्रयोगकर्तालाई निजी र सुरक्षित संवादबाट वञ्चित गर्नु पछाडि फर्किने कदम हो, जसले रुसमा सर्वसाधारणको सुरक्षा अझ कमजोर बनाउने बताएको छ । कम्पनीले प्रयोगकर्तालाई जोडिराख्न आफूहरूले सक्दो प्रयास जारी राख्ने पनि जनाएको छ ।
यो घटनाक्रम त्यतिबेला सार्वजनिक भएको हो जब रुसी नियामक निकायहरूले सुरक्षा कमजोरीको हवाला दिँदै टेलिग्रामको पहुँचसमेत थप सीमित बनाएका छन् । रुसमा टेलिग्रामका प्रयोगकर्ताको संख्या पनि व्हाट्सएपकै हाराहारीमा रहेको मानिन्छ ।
यस विषयमा प्रतिक्रिया लिन बीबीसीले रुसी पक्षसँग सम्पर्क गरेको जनाए पनि हालसम्म कुनै आधिकारिक प्रतिक्रिया प्राप्त भएको छैन ।
रुसमा डिजिटल सञ्चार माध्यममाथि बढ्दो नियन्त्रण र अभिव्यक्ति स्वतन्त्रताबारे अन्तर्राष्ट्रिय समुदायले चासो व्यक्त गर्दै आएको छ।
FACEBOOK COMMENTS