बुधबार, भदौ १०, २०८३
कर्पोरट खबर
11:26 am, बुधबार, भदौ १०, २०८३
गोरखा ।रसुवाबाट आउँदै गरेको बाढीको प्रभावबाट जोगिन त्रिशूली किनार आसपास रहेका गोरखाका जनप्रतिनिधिहरूले आग्रह गरेका छन् ।
त्रिशूली किनारमा अवस्थित गण्डकी गाउँपालिकाले आफ्ना नागरिकलाई त्रिशूली किनार आसपासमा नरहन आग्रह गरेको हो ।
‘हामीले नदी किनारका सबै टोल,बस्तीमा फोन गरी बस्ती खालि गरी सुरक्षित ठाउँमा जान आग्रह गरिसकेका छौँ’,गण्डकी गाउँपालिकाका प्रमुख दीपक तिमिल्सिनाले भने,‘चल सम्पतिलाई पनि सुरक्षित स्थानतर्फ सार्न भनेका छौँ ।’
अहिलेसम्म यहाँ नदीको बहाब नबढेको भन्दै उनले नागरिकको जीवन बचाउनु पहिलो कर्तव्य भएको बताएका छन् । ‘नदी आसपास रहेका विद्यालय बन्द गर्न पनि सूचना जारी गरेका छौँ । खेतबारीमा गएका किसानलाई समेत फोन गरी सुरक्षित स्थानमा जान भनेका छौँ’,उनले भने,‘चितवनतर्फका पालिकाका अध्यक्ष र अरु जनप्रतिनिधिहरूसँग पनि सहकार्य गरिरहेका छौँ ।’
गोरखाको गण्डकी–८सिउरेनीटारदेखि मुग्लिनसम्म त्रिशूली नदीले छोएको छ।‘त्रिशूली किनारमा रहेका सिउरेनीटार,धवादीघाट,ज्यामिरघाट,बुटार रागिनासदेखि मुग्लिनसम्मका वडाअध्यक्षहरू समन्वय गरी खटेका छौँ’,गण्डकी ७ का वडाअध्यक्ष तुलसी रेग्मीले भने,‘अहिलेसम्म त बाढी आएको छैन । तर हामीले अग्रिम सूचना जारी गरिसकेका छौँ ।’
