ओलीमाथि प्रदीप पौडेलको प्रश्नैप्रश्न

काठमाडौं, पुस १३ – नेपाली काँग्रेसका युवा नेता प्रदीप पौलेलले प्रधानमन्त्री केपी शर्मा ओलीको कार्यशैलीको चर्को आलोचना गरेका छन् । काँग्रेसले आयोजना गरेको देशव्यापी विरोध प्रदर्शन अन्तर्गत आज तनहुँको क्षेत्र नम्बर दुईमा पर्ने भीमादमा आयोजित विरोधसभालाई सम्बोधन गर्दै नेता पौडेलले ओलीले देश र जनताका लागि गर्नुपर्ने केही पनि नगरेको आरोप लगाए । 

‘ओलीजी तपाईंले भनेको चुच्चे रेल कता गुँडिरहेको छ?’, ओलीप्रति आक्रामक रुपमा प्रस्तुत भएका पौडेलले अगाडि प्रश्न गरे, ‘केपी ओलीलाई भ्रष्टाचारीलाई कारबाही गर्न कसले रोक्यो ? तपाईंले कति वटा घरमा ग्याँसका पाइप जोड्नु भयो ? नेपालको झण्डा फहराएको पानी जहाज प्रशान्त महासागरको कुन कुनामा पुग्यो ?’

पौडेलले ओली र राष्ट्रपति विद्यादेवी भण्डारी मिलेर संविधान नै समाप्त पार्न लागिपरेको आरोप समेत लगाए ।