अभिनेत्री ओलम्पिया डुकाकसको निधन

काठमाडौं, वैशाख १९ – ओस्कार अवार्ड जितेकी अमेरिकी अभिनेत्री ओलम्पिया डुकाकसको ८९ वर्षको उमेरमा निधन भएको छ ।सन् १९८७ को रोमान्टिक कमेडी चलचित्र मूनस्टकका लागि ओस्कार अवार्ड जितेकी ओलम्पियाको न्युयोर्क सिटीमा निधन भएको हो ।

उनका भाइ अपोलो डुकाकसका अनुसार महिनौँदेखि ओलम्पिया स्वास्थ्य समस्यासँग जुधिरहेकी थिइन् । उनमा के स्वास्थ्य समस्या थियो भन्नेबारे खुलाइएको छैन ।

सन् १९३१ मा मासाचुसेट्सको लोवेलमा जन्मिएकी ओलम्पियाले पछिल्लोपटक नेट्फिलिक्सको टिभी सिरिज टेल्स अफ द सिटीमा ट्रान्सजेण्डर ल्याण्डलेडीको भूमिका निर्वाह गरेकी थिइन् ।