चिलिमे-त्रिशुली र लेखनाथ-दमौली २२० केभी प्रशारण लाइन निर्माणमा जर्मन राजदूतको चासो

संसद्मा पेश भएको विद्युत् विद्येयकबारे रुसेको चिन्ता

काठमाडौं । ऊर्जा, जलस्रोत तथा सिँचाइमन्त्री पम्फा भुसालसँग नेपालका लागि जर्मनीका कार्यवाहक राजदूत स्टेफन रुसेकले भेटवार्ता गरेका छन् ।

भेटमा कार्यबाहक राजदूत रुसेकले नेपालको ऊर्जा क्षेत्रको विकासका लागि जर्मन सरकारले उपलब्ध गराउँदै आएको सहयोग आगामी दिनमा विस्तार गर्दै लैजाने बताए । नेपालको वैकल्पिक ऊर्जाका क्षेत्रमा पनि जर्मन सरकारले सहयोग गर्दै आएको उल्लेख गर्दै उक्त क्षेत्रमा थप सहकार्य गरेर अगाडि बढ्ने विश्वास दिलाए ।

चिलिमे–त्रिशुली र लेखनाथ–दमौली २२० केभी प्रशारण लाइन निर्माणमा आफ्नो सरकारको आर्थिक सहयोग रहेको जानकारी गराउँदै राजदूत रुसेकले ती आयोजनाको प्रगतिबारे जिज्ञासा राखे । त्यसैगरी संसद्मा पेश भएको विद्युत् विद्येयकबारे पनि कार्यबाहक राजदूत रुसेकले चासो व्यक्त गरे ।

जवाफमा मन्त्री भुसालले नेपाल-जर्मनीबीच रहीआएको आपसी सम्बन्ध आगामी दिनमा अझ प्रगाढ हुँदै जाने विश्वास व्यक्त गर्दै सामाजिक एवं आर्थिक क्षेत्रमा जर्मनी सरकारले पु¥याउँदै आएको सहयोग आगामी दिनमा पनि अपेक्षा रहेको बताइन् ।

मन्त्री भुसालले जर्मनीबाट प्राप्त आर्थिक एवं प्राविधिक सहयोगलाई सही तवरले उपयोग गरिने विश्वास दिलाउँदै नेपालले राखेका लक्ष्य प्राप्तिका लागि जर्मनीबाट सहयोग रहने अपेक्षा रहेको बताइन । उनले भूकम्पपछिको पुनःनिर्माण एवं कोभिड–१९ सङ्क्रमण नियन्त्रणका लागि जर्मनीले पु¥याएको सहयोगप्रति खुसी व्यक्त गरिन ।