अञ्जनले उद्योग वाणिज्य महासंघको ‘स्टेरिङ’ भोलिदेखि सम्हाल्दै, तर कसरी हाँक्लान ?

निजी क्षेत्र र यसका हस्तिहरूले यसअघिदेखि नै स्थापित गरेको ‘पहिला सुन, अनि मात्रै थुन’ भन्ने भाष्यलाई थप सशक्त बनाइ महासंघको गरिमा यसको हैसियतलाई कायम राख्नु अहिलेको चुनौती छ

काठमाडौं । देशभरका उद्योगी–व्यवसायीहरूको छाता सङ्गठन नेपाल उद्योग वाणिज्य महासंघ (एफएनसीसीआई) ले आगामी तीन वर्षका लागि नयाँ नेतृत्व पाएको छ ।

केही सामान्य झमेलाहरूलाई जसोतसो झेल्दै सोमबार उद्घाटन गरिएको ६०औँ वार्षिक साधारण सभा तथा अधिवेशनले महासंघका वरिष्ठ उपाध्यक्ष अञ्जन श्रेष्ठको नेतृत्वमा आज बुधबार नयाँ कार्यसमिति चयन गरेको हो । विधानको व्यवस्था अनुसार वरिष्ठ उपाध्यक्ष श्रेष्ठ स्वत: अध्यक्ष बनेका छन् भने अन्य दर्जनौँ पदहरू निर्वाचनमार्फत पूर्ति गरिएको छ ।

मंगलबार प्राप्त अन्तिम मत परिणाम अनुसार महासंघको जिल्ला/नगरबाट उपाध्यक्षमा कृष्ण प्रसाद शर्मा र दिल सुन्दर श्रेष्ठ निर्वाचित भएका छन् । वस्तुगतबाट नरेशलाल श्रेष्ठ तथा एसोसिएट्सबाट प्रवल जंग पाण्डे उपाध्यक्ष निर्वाचित भएका छन् । पदाधिकारीमा वरिष्ठ उपाध्यक्ष र कोषाध्यक्ष अहिले निर्वाचित कार्यकारिणी समितिले विधानमा भएको व्यवस्थाबमोजिम पछि चयन गर्ने छ ।

हालै सम्पन्न निर्वाचनले जिल्ला नगरबाट १५ जना खुल्ला सदस्य, दुई जना महिला सदस्य र प्रत्येक प्रदेशबाट दुई/दुई जना गरी कूल ३१ जना कार्यकारिणी सदस्य निर्वाचित गरेको छ ।

यस्तै, वस्तुगतबाट १३ जना खुल्ला सदस्य, एक जना महिला सदस्य, दुई जना वस्तुगत महासंघ सदस्य गरी कूल १६ जना केन्द्रीय कार्यकारिणी सदस्य निर्वाचित गरेको छ । यस कलष्टरको खुल्ला सदस्यमा १३ जना निर्वाचित हुने व्यवस्था भए पनि यस पटक १५ जना निर्वाचित भएका छन् । अन्तिम चार जनाले समान ५०/५० मत प्राप्त गरेपछि आधा–आधा कार्यकाल बाँड्ने सहमति जुटेको निर्वाचन समितिले जनाएको छ ।

एसोसिएट्सतर्फ १७ जना खुल्ला सदस्य र दुई जना महिला सदस्य निर्वाचित भएका छन् । यसैगरी, द्विराष्ट्रिय उद्योग वाणिज्य संघबाट एक जना र संस्थापक सदस्य समूहबाट दुई जना सदस्य निर्वाचित भएका छन् ।

महासंघको नयाँ नेतृत्व चयनका लागि मंगलबार निर्वाचन भएको थियो । निर्वाचित हुने कूल ७३ पदका लागि १३७ जनाले प्रतिस्पर्धा गरेका थिए ।

तालिकामा हेर्नुहोस् नयाँ कार्यसमितिको सूची–

क्र.स.	नाम/थर	मनोनयनकर्ता संघ/संस्थाको नाम	प्राप्त मत
पद : उपाध्यक्ष (जिल्ला/नगर उद्योग वाणिज्य समूह
१	कृष्ण प्रसाद शर्मा	सिदार्थ उद्योग वाणिज्य संघ, रुपन्देही	८७
२	दिल सुन्दर श्रेष्ठ	धुलीखेल उद्योग वाणिज्य संघ	८०
पद : कार्यसमिति सदस्य (खुला) जिल्ला/नगर उद्योग वाणिज्य संघ
१	प्रयास कार्की	उदयपुर उद्योग वाणिज्य संघ	१११
२	अर्जुन कुमार श्रेष्ठ	सिन्धुली उद्योग वाणिज्य संघ	११०
३	दीपक नेपाल	पाँचथर उद्योग वाणिज्य संघ	११०
४	कृष्ण कटुवाल	मकवानपुर उद्योग वाणिज्य संघ	१०५
५	छत्रधर आत्रेय	लेखनाथ उद्योग वाणिज्य संघ	१०४
६	मोहन प्रसाद श्रेष्ठ	पाल्पा उद्योग वाणिज्य संघ	१०२
७	लक्ष्मण राज पौडेल	कोहलपुर उद्योग वाणिज्य संघ	१०४
८	सन्तोष खड्का	टिकापुर उद्योग वाणिज्य संघ	१०२
९	केशव प्रसाद भण्डारी	नवलपरासी उद्योग वाणिज्य संघ	१००
१०	गोकुल श्रेष्ठ	दमक उद्योग वाणिज्य संघ	९७
११	हरिप्रसाद अर्याल	बुटवल उद्योग वाणिज्य संघ	९२
१२	ताराबहादुर कार्की	नुवाकोट उद्योग वाणिज्य संघ	९०
१३	शंकर गिरी	रत्ननगर उद्योग वाणिज्य संघ	८६
१४	सुदर्शन कार्की	जिरी उद्योग वाणिज्य संघ	८१
१५	उज्ज्वल प्रसाद कसजु	रामपुर उद्योग वाणिज्य संघ	८२
पद : कार्यसमिति सदस्य महिला (जिल्ला/नगर उद्योग वाणिज्य संघ)
१	गीता अमात्य	नुवाकोट उद्योग वाणिज्य संघ	८१
२	हिरा भट्टराई	पोखरा उद्योग वाणिज्य संघ	६३
पद : कार्य समिति सदस्य (जिल्ला/नगर उद्योग वाणिज्य संघ) प्रत्येक प्रदेशबाट दुई/दुई जना
	कोशी प्रदेश
१	जीवन पराजुली	उद्योग वाणिज्य संघ इटहरी	१६
२	रमेश विश्वकर्मा	त्रियुगा उद्योग वाणिज्य संघ	१५
	मधेश प्रदेश
१	विकास कुमार सारडा	जिल्ला उद्योग वाणिज्य संघ सिरहा, लहान	९
२	अमर नाथ साह	सिरहा उद्योग वाणिज्य संघ	७
	बागमती प्रदेश
१	सविन श्रेष्ठ	ललितपुर उद्योग वाणिज्य संघ	११
२	प्रकाश मानन्धर	काभ्रे उद्योग वाणिज्य संघ	१०
	गण्डकी प्रदेश
१	पविन्द्र कुमार श्रेष्ठ	तनहुँ उद्योग वाणिज्य संघ	९
२	सुविन श्रेष्ठ	म्याग्दी उद्योग वाणिज्य संघ	९
	लुम्बिनी प्रदेश
१	यज्ञ प्रसाद भट्टराई	कपिलवस्तु उद्योग वाणिज्य संघ	२४
२	बालकृष्ण सुवेदी	रोल्पा उद्योग वाणिज्य संघ	२४
	कर्णाली प्रदेश
१	पदम बहादुर शाही	सुर्खेत उद्योग वाणिज्य संघ	निर्विरोध निर्वाचित
२	पुरिचन्द्र देवकोटा	जुम्ला उद्योग वाणिज्य संघ	निर्विरोध निर्वाचित
	सुदूरपश्चिम प्रदेश
१	पिताम्बर जोशी	कञ्चनपुर उद्योग वाणिज्य संघ	१०
२	दानबहादुर सुर्मेली	बझाङ उद्योग वाणिज्य संघ	७
३	पदम राज चौलागाईं	लम्कीचुहा उद्योग वाणिज्य संघ	७
पद : उपाध्यक्ष (वस्तुगत)
१	नरेश लाल श्रेष्ठ	नेपाल निर्यात परिषद्	६३
पद : कार्य समिति सदस्य (वस्तुगत)
१	अरनिको राजभण्डारी	नेपाल आइसक्रिम उद्योग व्यवसाय संघ	७०
२	विदुर धमला	नेपाल जग्गा तथा आवास विकास संघ	६८
३	सागर ढकाल	स्टक ब्रोकर्स एसोसिएशन अफ नेपाल	६८
४	रविन पुरी	नेपाल धान उद्योग संघ	६६
५	राज कुमार कार्की (राजु)	नेपाल कुचो संघ	६३
६	पशुपति देव पाण्डे	नेपाल तयारी पोशाक उद्योग संघ	६२
७	लिलेन्द्र प्रसाद प्रधान	नेपाल पेट्रोलियम डिलर्स राष्ट्रिय एसोसिएशन	६२
८	भक्त बहादुर हमाल	रसायन तथा मेडिकल आपूर्ति संघ	५६
९	नानिराज घिमिरे	नेपाल चलचित्र निर्माता संघ	५२
१०	संघर्ष विष्ट	रेष्टुरेन्ट तथा बार एसोसिएशन नेपाल	५१
११	होम प्रसाद घिमिरे	नेपाल प्लाइउड उत्पादक संघ	५१
१२	निराजन बहादुर चलाउने	नेपाल संगीत उद्योग संघ	५०
१३	विप्लव अधिकारी	नेपाल औषधि उत्पादक संघ	५०
१४	सुरज बन्जाडे	फुटवेयर म्यानुफ्याक्चरर्स एसोसिएशन अफ नेपाल	५०
१५	रघुनन्दन मारु	नेपाल प्लास्टिक उत्पादक संघ	५०
पद : महिला सदस्य (वस्तुगत)
१	सुनिता न्हेम्हाफुकी	नेपाल कृषि मेसिनरी व्यवसायी संघ	५४
पद : वस्तुगत महासंघ सदस्य
१	सुनैना घिमिरे	कम्प्युटर एसोसिएशन नेपाल महासंघ	११
२	विश्वनाथ खनाल	ढुवानी व्यवसायी महासंघ नेपाल	९
पद : उपाध्यक्ष (एसोसिएट्स)
१	प्रवल जंग पाण्डे	लोमस फार्मास्युटिकल्स प्रा.लि.	१,०७९
पद : कार्यसमिति सदस्य (एसोसिएट्स) खुल्ला
१	सचिन ढकाल	आई.एम.ई. ग्रुप प्रा.लि.	१,३१८
२	हेमन्त गोल्छा	हुलास रेमिटेन्स प्रा.लि.	१,२०२
३	अम्बिका प्रसाद पौडेल	स्काइ टच इन्भेष्टमेन्ट एण्ड कन्सल्टेन्ट प्रा.लि.	१,१८२
४	उज्जवल कुमार श्रेष्ठ	पञ्चकन्या कन्क्रिट प्रिमिक्स प्रा.लि.	१,१५६
५	शक्ति कुमार बेगानी	गणपति ज्वेलर्स नेपाल प्रा.लि.	१,१४२
६	ऋषि अग्रवाल	यति पोलिकेम प्रा.लि.	१,१२२
७	सुशील थापा	साहस ऊर्जा लि.	१,०९४
८	राजेश कुमार अग्रवाल	अर्घाखाँची सिमेन्ट लिमिटेड	१,०८२
९	सुयस प्याकुरेल	एस.एम. पोलिमर्स प्रा.लि.	१,०६९
१०	रामशरण भण्डारी	हस्पिटल फर एडभान्स मेडिसिन एण्ड सर्जरी लि.	१,०४३
११	बाबुकाजी कार्की	बुढानीलकण्ठ हेरिटेज लि.	१,००६
१२	दिवस न्यौपाने	सर्वोत्तम सिमेन्ट लि.	९९१
१३	कृष्ण लाल महर्जन	क्लासिक डायमण्ड ज्वेलर्स प्रा.लि.	९७४
१४	प्रिय राज रेग्मी	क्रिस्टल कञ्चनजङ्घा सेक्युरिटिज प्रा.लि.	९५४
१५	ईश्वर बहादुर जीसी	एच.डी. इन्डष्ट्रीज प्रा.लि.	९४९
१६	सुरज उप्रेती	एस.आर. फुड्स प्रा.लि.	९०७
१७	बटु लामिछाने	अर्बिट इनर्जी प्रा.लि.	८६०
पद : कार्यसमिति सदस्य महिला (एसोसिएट्स) खुल्ला
१	जुना माथेमा	सेवा सेक्युरिटिज प्रा.लि.	१,१५६
२	अभिज्ञा मल्ल	बुकिङ वेज नेपाल प्रा.लि.	१,०५९
पद : कार्यसमिति सदस्य (द्विराष्ट्रिय उद्योग वाणिज्य संघ)
१	मनोज पौडेल	नेपाल मलेसिया उद्योग वाणिज्य संघ	५
पद : कार्यसमिति सदस्य (संस्थापक सदस्य समूह)
१	गोपाल श्रेष्ठ	सुनसरी उद्योग वाणिज्य संघ, धरान	१०
२	सुमन कुमार श्रेष्ठ	चितवन उद्योग वाणिज्य संघ	१०

अञ्जनले कसरी हाँक्लान महासंघ ?

हरेक तीन–तीन वर्षमा नयाँ नेतृत्व चयन गर्ने महासंघको यो नियमित प्रक्रिया नै हो । सोही अनुसार अञ्जन श्रेष्ठको नेतृत्वमा नयाँ कार्यकारिणी समिति बनेको हो । तर, विगतको तुलनामा यो नेतृत्व र कार्यकाल निकै सकसपूर्ण बन्ने अनुमान गरिएको छ ।

राजनीतिक नेतृत्वको अकर्मण्यता, कर्मचारीतन्त्रको मनोमानी र निजी क्षेत्रभित्र घुसेर स्वार्थको रोटी सेक्ने प्रवृत्तिका कारण मुलुकले पछिल्लो समय ठूलो जनधनको क्षति व्यहोरेर फेरि उठ्ने प्रयास गरिरहेको छ । खासगरी गत भदौ २३ र २४ गते भएको ‘जेन–जी मुभमेन्ट’ले नेपालको राजनीतिक दिशा नै परिवर्तन गरिदिएको छ ।

फलस्वरुप मुलुकमा दुर्लभझैं मानिएको दुई तिहाईको सरकार गठन भएको मात्र छैन ४० वर्ष भन्दा कम उमेरको अति जुझारु व्यक्तिलाई यो देशले प्रधानमन्त्रीको रूपमा पाएको छ । प्रतिनिधि सभादेखि क्याबिनेटसम्मै ४० वर्षमुनिका युवायुवतीहरूको वर्चश्व छ । युवा जोशले देश बनाउँछ कि बिगार्छ भन्ने चिन्ताको कोणबाट बहसहरू पनि भइरहेका छन्, तर सरकारले आफ्नो रफ्तारलाई तीव्र पार्ने सङ्केत दिँदै अघि बढिरहेको छ ।

सरकारको रफ्तारकै क्रममा निजी क्षेत्रमाथि धरपकडको सिलसिला पनि अघि बढाएको छ । सरकार बनेकै राति पूर्वप्रधानमन्त्री र पूर्वगृहमन्त्रीलाई पक्राउ गरेर काम सुरू गरेको सरकारले त्यसलगत्तै उद्योग–व्यवसाय क्षेत्रका मुर्धन्य व्यक्तिहरूलाई पनि पक्राउ गरेको छ । सुशासन र भ्रष्टाचार नियन्त्रणको अभियान चलाएको यो सरकारले आर्थिक अनियमितता, शेयर कारोबार, ठगी, डिजिटल प्रणाली दुरुपयोग जस्ता मुद्दामा उद्योगी–व्यवसायीहरूलाई पक्राउ पर्ने क्रम तीब्र पारेको छ ।

सरकार बनेको करिब डेढ महिनाको अवधिमा दीपक भट्ट, शंकर अग्रवाल, सुलभ अग्रवाल, शेखर गोल्छा, स्वदेश पोखरेल, प्रकाश ढुङ्गानालगायतलाई पक्राउ गरिसकेको छ । अझै केही ठूला उद्योगी–व्यवसायीहरू पक्राउको सूचीमा रहेको भनेर बजार हल्लाहरू समेत चलाइएको छ । नेपाल उद्योग वाणिज्य महासंघका पूर्व अध्यक्ष समेत रहेका उद्योगी शेखर गोल्छालाई पक्राउ गरी अनुसन्धानपछि हालै छोडिएको छ । अझै केही व्यवसायी थुनामै छन् ।

सरकारको यो कदमप्रति निजी क्षेत्रका ‘एपेक्स वडी’हरू जम्मा एक थान ‘प्रेस विज्ञप्ति’को हकदार मात्र भएको देखिएको छ । विगतमा यस्ता घटना हुँदा सम्बन्धित पक्षको ध्यानाकर्षण गराउनेदेखि साना–ठूला आन्दोलन नै आयोजना गर्ने निजी क्षेत्रका सङ्गठनहरूको त्यो शक्ति यतिबेला आम उद्योगी–व्यवसायीहरूले खोजिरहेका छन्, तर भेट्टाएका छैनन् ।

नेपाल उद्योग वाणिज्य महासंघ (एफएनसीसीआई), नेपाल उद्योग परिसंघ (सीएनआई) र नेपाल चेम्बर अफ कमर्स (एनसीसी) जस्ता एपेक्स बडीहरूको पछिल्लो प्रस्तुतिले अब निजी क्षेत्रलाई सुरक्षित र मर्यादित राख्न सक्छ कि सक्दैन भन्ने प्रश्न चिह्न खडा हुन खोजिरहेको छ । यस्तो विषम् परिस्थितिका बीच आएको अञ्जन श्रेष्ठ नेतृत्वको महासंघले असाध्यै संवेदनशील र गम्भीर भएर काम गर्नुपर्ने अवस्था छ ।

निजी क्षेत्र र यसका हस्तिहरूले यसअघिदेखि नै स्थापित गरेको ‘पहिला सुन, अनि मात्रै थुन’ भन्ने भाष्यलाई थप सशक्त बनाइ महासंघको गरिमा यसको हैसियतलाई कायम राख्नु अहिलेको चुनौती छ । यो चुनौतीलाई नवनिर्वाचित नयाँ कार्यकारिणी समितिले सहजै सामना गर्न सक्षम बनोस्, शुभकामना !