काठमाडौं । नेपाल निर्माण व्यवसायी महासंघले निर्माणाधीन नालीको खाल्डोमा परेर गैंडा मरेको विषयलाई लिएर निर्माण व्यवसायीलाई कारबाही गरिनु कानुनविपरीत भएको बताएको छ ।
सडक विस्तारका क्रममा नाली बनाउन खनिएको खाल्डोमा परेर चितवनमा एकसिंगे गैडा मरेको घटनालाई लिएर सम्बन्धित निर्माण व्यवसायीमाथि पक्राउ पूर्जी जारी गरेको भन्दै महासंघले आपत्ति प्रकट समेत गरेको छ । निर्माण व्यवसायीलाई आरोपित गरी गैरकानुनी रूपमा कारबाही अगाडि बढाइएको घटनाप्रति महासंघले विज्ञप्ति जारी गरेर विरोध जनाएको हो ।
निर्माण कम्पनी इन्डो—सगुन जेभीबाट उक्त निर्माण कार्यका क्रममा राष्ट्रिय निकुञ्ज तथा वन्यजन्तु संरक्षण ऐन नियम विपरित हुने कुनै पनि काम कार्वाही नभएको र निर्माण सम्झौता बमोजिम नै निर्माण कम्पनीले अनुसरण गर्नुपर्ने सम्पूर्ण सुरक्षाका मापदण्ड अपनाइएको महासंघले दाबी गरेको छ ।
सडक डिभिजन कार्यालय भरतपुरअन्तर्गतको उक्त आयोजनाको निर्माण क्षेत्रमा गैंडाको प्राकृतिक आवतजावतको क्रममा भएको दुःखद निधनको तथ्यलाई तोडमोड गरिएको महासंघको भनाइ छ ।
‘तथ्य तोडमोड गरी निर्माण व्यवसायी उपर प्रचलित कानुन विपरीत हुने गरी अनुसन्धानको नाममा पक्राउ पूर्जी जारी गर्ने, दुःख—हैरानी दिने कार्यबाट विभिन्न बाधा अड्चनका बाबजुद भौतिक पूर्वाधार निर्माण कार्यमा अहोरात्र खटिएका व्यवसायीहरूको मनोबल गिराउने र निर्माण कार्यलाई अगाडि बढाउन हतोत्साहित गर्ने काम भएको महासंघको ठहर छ,’ महासंघका महासचिव रोशन दाहालद्वारा शुक्रबार जारी विज्ञप्तिमा उल्लेख छ ।
निर्माण स्थलमा कङ्क्रिटको नाली बनाइसकेपछि पूर्ण रूपमा सेट हुनका लागि प्राविधिक रूपमा केही दिन खुल्लै राख्नुपर्ने प्रावधान रहेकाले नाली नपुरिएको र सम्झौताबमोजिम कम्पनीले साइट सुरक्षाका मापदण्ड र उपायहरू अनुशरण गरी आयोजनाको नियमित सुपरीवेक्षण र निर्देशनमा निर्माण कार्य गरिरहेको अवस्थामा प्राकृतिक रूपमा घटना भएको तथ्य जगजाहेर हुँदाहुँदै निर्माण व्यवसायीलाई नियोजित रूपमा आरोपित गरी झुठा लान्छना लगाई व्यवसायीहरूलाई मुछेर मानमर्दन गरिएको कार्यप्रति महासंघले गम्भीर आपत्ति जनाएको छ ।
घटनालाई लिएर निर्माण कम्पनी इन्डो–सगुन जेभीका प्रतिनिधि सहदेव खड्कालाई अनुसन्धानको नाममा झूठा लान्छाना लगाई पक्राउ पूर्जी जारी गरी पक्राउ गर्नेलगायत काम कारबाही तत्काल रोक्न महासंघले जोडदार माग समेत गरेको छ ।
साथै भविष्यमा समेत पूर्वाधार विकास निर्माणका कार्यहरू हुने क्षेत्रमा प्राकृतिक रूपमा हुने यस्ता किसिमका घटनाहरूमा निर्माण व्यवसायीलाई आरोपित गर्ने कार्य नगर्न समेत महासंघले नेपाल सरकार तथा सम्बन्धित निकायहरूसँग माग गरेको छ ।
विश्वमै दुलर्भ एकसिंगे गैडाको निधनबाट महासंघ समेत दुःखी भएको विज्ञप्तिमा उल्लेख छ । घटनाको छानविन गर्न वन मन्त्रालयद्घारा गठित छानविन समितिमा नेपाल निर्माण व्यवसायी महासंघका प्रतिनिधि र भौतिक पूर्वाधार तथा यातायात मन्त्रालयको समेत संलग्नता हुने गरी एक निष्पक्ष एव्म स्वतन्त्र छानविन समिति गठन गरी यस घटनाको विना कुनै पूर्वाग्रह सत्य तथ्य सार्वजनिक गर्न महासंघले जोडदार माग गरेको छ ।
FACEBOOK COMMENTS