हिमालयन बुलियन कम्पनीले बाढीपीडितका लागि १ करोड १ लाख सहयोग गर्ने

काठमाडौं । हिमालयन बुलियन कम्पनी लिमिटेडले रसुवा, नुवाकोट, धादिङलगायत भोटेकोशी तटीय क्षेत्रमा आएको विनाशकारी बाढीबाट प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा १ करोड १ लाख रुपैयाँ सहयोग गर्ने घोषणा गरेको छ।

कम्पनीका अनुसार यसअघि भदौ ११ गते कोषमा २१ लाख रुपैयाँ जम्मा गरिसकिएको थियो। त्यसमा थप ८० लाख रुपैयाँ सहयोग गर्ने निर्णय गरेसँगै कम्पनीको कुल सहयोग रकम १ करोड १ लाख रुपैयाँ पुगेको हो।

कम्पनीका प्रतिनिधिहरू राकेश कुमार अडुकिया, रोहन अडुकिया, भीष्म प्रसाद गौतम, जीवन घिमिरे र राजेन्द्र न्यौपानेले भदौ १२ गते अर्थ मन्त्रालयमा अर्थमन्त्री डा. स्वर्णिम वाग्लेलाई सहयोग रकमको चेक हस्तान्तरण गरेका छन्।

भोटेकोशी बाढीबाट रसुवा, नुवाकोट, धादिङलगायत क्षेत्रमा भएको ठूलो मानवीय तथा भौतिक क्षतिप्रति कम्पनीले गहिरो दु:ख व्यक्त गरेको छ। बाढीमा ज्यान गुमाउनेप्रति श्रद्धाञ्जली अर्पण गर्दै शोकसन्तप्त परिवारजनमा समवेदना प्रकट गरेको कम्पनीले जनाएको छ।

कम्पनीले बाढीमा घाइते भएकाहरूको शीघ्र स्वास्थ्यलाभको कामना गर्दै विपद्को यस कठिन घडीमा पीडित परिवारसँग आफूहरू साथमा रहेको जनाएको छ।

खोज, उद्धार, राहत तथा पुन:स्थापनामा सहयोग गर्नु आफ्नो सामाजिक तथा मानवीय दायित्व भएको भन्दै कम्पनीले विपद्बाट प्रभावित नागरिकलाई सहयोग पुर्‍याउने प्रतिबद्धता जनाएको छ।