बीमा दाबी भुक्तानीमा हुने ढिलाइको अनुसन्धान गर्न आईआईएनलाई अध्यक्ष दाहालको निर्देशन

काठमाडौं । नेपाल बीमा प्राधिकरणका अध्यक्ष मदन दाहालले बीमा दाबी भुक्तानीमा हुने ढिलाइमा अनुसन्धान गर्न इन्स्योरेन्स इन्ष्टिच्युट अफ नेपाल (आईआईएन) लाई निर्देशन दिएका छन् ।

आईआईएनको छैटौं वार्षिक साधारणसभाको उद्घाटन गर्दै अध्यक्ष दाहालले आईआईएनलाई बीमासम्बन्धी तालिमसँगसँगै दाबी भुक्तानीमा हुने ढिलाइका साथै अन्य नयाँनयाँ विषयमा अनुसन्धान गर्न निर्देशन दिएका हुन् ।

इन्स्योरेन्स इन्ष्टिच्युट अफ नेपालका संरक्षकसमेत रहेका अध्यक्ष दाहालले बीमा क्षेत्रको विकासलाई अझै उचाइमा पुर्‍याउनका लागि आफ्नो क्षेत्रबाट मेहनतका साथ अगाडि बढ्न पनि आईआईएनलाई निर्देशन दिए ।

अध्यक्ष दाहालले भने, ‘बीमा सर्भेयर र बीमा अभिकर्ताले इजाजतपत्र नवीकरण गर्न तालिम लिएको हुनुपर्ने सम्बन्धमा अध्ययन गरी सुझाव दिन समिति गठन गरिएको छ । समितिबाट सुझाव आएपछि कार्यान्वयनमा ल्याइनेछ । देशभरका सबै बीमा सर्भेयर र बीमा अभिकर्तालाई तालिम दिनका लागि आईआईएनले तालिमलाई विकेन्द्रीकरण गर्दै तीव्रता दिनुपर्छ ।’

त्यस अवसरमा अध्यक्ष दाहालले आईआईएनको सञ्चालक समितिका पूर्वअध्यक्ष राजुरमण पौडेललाई कदरपत्र प्रदान गरे । आईआईएनको सञ्चालक समितिका अध्यक्ष दीपप्रकाश पाण्डेले आईआईएनको वार्षिक प्रतिवेदन प्रस्तुत गरे ।

आईआईएनका प्रमुख कार्यकारी अधिकृत सुशीलदेव सुवेदीले आईआईएनले बीमा क्षेत्रका विशेषज्ञहरूको सहभागिता तथा अन्तर्राष्ट्रिय सस्थाहरूसँगको सहकार्यमा समेत विभिन्न तालिम तथा कार्यक्रमहरू सञ्चालन गर्दै आएको र स्नातकोत्तर तहमा बीमा विषयको अध्यापन तथा अनुसन्धानका लागि काठमाडौं विश्वविद्यालयसँग समन्वयन एवं सहकार्य हुँदै आएको जानकारी दिए ।

साधारणसभामा आईआईएनका सञ्चालक समितिका सदस्यहरू तथा शेयरधनीहरू जीवन बीमा कम्पनी, निर्जीवन बीमा कम्पनी र पुनर्बीमा कम्पनीका प्रमुख कार्यकारी अधिकृतहरूको सहभागिता रहेको थियो । वार्षिक प्रतिवेदन पास गर्दै आइतबार काठमाडौंमा आईआईएनको छैटौं वार्षिक साधारणसभा सम्पन्न भएको हो ।