प्रचण्डलाई प्रश्न– रगतले लतपतिएको जनयुद्धको सम्पत्ति कहाँ लगेर हाल्नुभयो ?

दरबार हत्याकाण्ड छानविन होइन पहिला आफ्नो छोरा प्रकाशको हत्यारा पत्ता लगाउन दुर्गाको आग्रह

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’माथि जनयुद्ध चलाएर अकुत सम्पत्ति आर्जन गरेको र त्यो पैसा नेपालबाहिर लगेको आरोप लागेको छ ।

राष्ट्र, राष्ट्रियता, धर्म, संस्कृति तथा नागरिक बचाउ महाअभियानका नेतृत्वकर्ता दुर्गा प्रसाईंले पूर्वप्रधानमन्त्री समेत रहेका अध्यक्ष प्रचण्डमाथि यस्तो गम्भीर आरोप लगाएका हुन् । आफू लामो समय प्रचण्डसँग नजिक रहेर काम गरेको हवला दिँदै प्रसाईंले ‘१७ हजार ५०० को रगतले लतपतिएको जनयुद्धको सम्पत्ति कहाँ लगेर हाल्नुभयो’ भनेर प्रश्न समेत गरेका छन् ।

पछिल्लो समय राजसंस्था फर्काउने आन्दोलनमा सक्रिय बनेका प्रसाईंले गणतन्त्रवादी नेताहरूप्रति तीव्र आलोचना र अनेक लाञ्छना लगाउन थालेका छन् । यसै सन्दर्भमा उनले नेकपा माओवादी केन्द्रका अध्यक्षमाथि यस्तो गम्भीर आरोप लगाएका हुन् ।

खासगरी पूर्वराजा ज्ञानेन्द्र शाहमाथि नेताहरूले कडा अभिव्यक्ति दिएकोमा आक्रोश व्यक्त गर्दै उनले विभिन्न सञ्चार माध्यमहरूमार्फत भनेका छन्, ‘अहिले केपी ओलीलाई भन्दा प्रचण्डलाई सनक चढेको छ । म भन्छु तपाइँ नसन्किँदा हुन्छ । म तपाइँसँग नजिक रहेर काम गरेको मान्छे हुँ । १७ हजार ५०० को रगतले लतपतिएको जनयुद्धको सम्पत्ति कहाँ लगेर हाल्नुभयो ? पचासौँ हजार मान्छे आज पनि घाइते अवस्थामा छन् । उनीहरूको हिसाबकिताब कसले गर्ने ?’

यस्तै, उनले जनयुद्धका नाममा बम पड्काएर खरबौँको नेपाली सम्पत्ति खरानी बनाएको तथा जनयुद्धका नाममा नेपालदेखि विदेशसम्म व्यक्तिगत सम्पत्ति जोडेको आरोप पनि लगाएका छन् । ‘खरबौँको सम्पत्ति बम हानेर उडाउनुभयो त्यतिखेर । तपाइँको छोराले दुबईमा लगेको २६ करोड रुपैयाँको हिसाबकिताब कसले दिने ? तपाइँले स्वीट्जरल्याण्ड र अमेरिकामा घर किन्नुभएको छ त्यो कुन पैसाले किन्नुभयो ?,’ उनले प्रश्न गरेका छन् । अहिले प्रचण्डले भोगचलन गरिरहेको सम्पत्ति र तडकभडक युद्धकालमा जोडेको सम्पत्तिको आड भएको प्रसाईंको भनाइ छ ।

प्रचण्डको जीवशैलीबारे प्रश्न उठाउँदै उनले भनेका छन्, ‘हिजो साधारण विवाह गर्दा भाटे कारबाही गर्ने तपाइँले आफ्नी नातिनीहरूको विवाह फाइभ–स्टार होटेलमा कहाँको पैसाले गर्नुभयो ? अरुलाई रक्सी खायो भनेर भाटे कारबाही गर्ने तपाइँको घरमा अहिले एक करोड पर्ने रक्सी कहाँबाट आयो ?’

प्रसाईंले दरबार हत्याकाण्डको विषयमा पनि धेरै नबोलन चेतावनी दिएका छन् । पहिला आफ्नो छोराको हत्यारा पत्ता लगाएर मात्रै दरबार हत्याकाण्डको विषय उठान गर्न उनले चुनौती दिएका छन् । उनले प्रश्नैप्रश्न तेर्स्याउँदै भनेका छन्, ‘तपाइँले आफ्नो छोराको हत्यारा पत्ता लगाउनुभयो ? तपाइँ त्यतिखेर मैसँग हुनुहुन्थ्यो । दरबार हत्याकाण्डको कुरा निकाल्दै गर्दाखेरि यत्रो १८–२० वर्षसम्म सत्तामा बस्दा कसको भेडाबाख्रा हेर्न जानुभएको थियो ?’