भाटभटेनीमा लुटेराहरूलाई लाठी लाउने सुरक्षा गार्डलाई ५ लाख नगद र ५ ग्रेड बढुवा पुरस्कार

काठमाडौं । भाटभटेनी सुपरमार्केले सुरक्षा गार्ड दुलप्रसाद पराजुलीलाई पुरस्कृत गरेको छ ।

पराजुलीले गत चैत १५ गतेको राजावादी आन्दाेलनमा भएकाे लुटपाटकाे घटनामा बहादुरी देखाएकाे भन्दै उनकाे सम्मान स्वरूप पुरस्कृत गरेको हाे ।

पराजुलीलाई आज एक कार्यक्रमबीच ५ लाख नगद रुपैयाँ पुरस्कार र पाँच ग्रेड बढुवाको सम्मान प्रदान गरिएको छ । भाटभटेनीका मालिक मीनबहादुर गुरुङले पराजुलीलाई दुबाेकाे माला लगाईदिएर सम्मान गरे ।

साे दिन भएको लुटपाट र तोडफोडमा भाटभटेनीलाई जोगाउन भूमिका खेल्ने अन्य  तीन सुरक्षा गार्ड सूर्य गिरी, दीपेश खड्का, सोमबहादुर भुजेललाई २५ हजार १ रुपैयाँ र एक ग्रेड बढुवा गरिएको छ ।

यस्तै ग्रोसरी सिनियर सुपरभाइजर सागर गुरुङलाई ५१ हजार एक सय ११ को चेक र दुई ग्रेड बढुवा प्राप्त गरेका छन् ।
सुरक्षा गार्ड पराजुलीले लुटेराहरूलाई पिटेर लखेटेको भिडिओ सामाजिक सञ्जालमा भाइरल भएको थियो ।