वर्षाका कारण रोकिएको नेपाल र यूएईको फाइनल खेल आज हुँने

काठमाडौं । निरन्तर वर्षाका कारण सोमबार रोकिएको नेपाल र यूएईबीचको एसीसी प्रिमियर कपको फाइनल खेल आज हुँनेछ । सोमबार रोकिएको चरणबाट बाँकी खेल हुनेछ । आज बिहान ९ बजेदेखि खेल सुरु हुने नेपाल क्रिकेट संघ क्यानले जानकारी गराएको छ ।

फाइनल खेलका लागि यसअघि नै एक दिन थप ‘रिजर्भ डे’ राखिएको थियो । सोमबार यूएईले २७.३ ओभरमा ९ विकेटको क्षतिमा १०६ रन बनाउँदा पानी परेपछि खेल रोकिएको थियो ।

टस हारेर ब्याटिङ गरेको यूएईका लागि आसिफ खानले सर्वाधिक ४६ रन बनाए भने आर्यन लाक्राले १३ तथा मुहमद वसिमले ११ रन बनाए । नेपालका लागि ललित राजवंशीले ३, सन्दीप लामिछाने र करन केसीले २–२ विकेट लिएका छन् । यस्तै गुल्सन झा र सोमपाल कामीले १–१ विकेट लिए ।