कबाडी संकलन गर्नेसँग हुनुहोस् होसियार, हुन सक्छ चोरी

कबाडी संकलनको बहनामा करोडौँ चोरी गर्ने पाँच जना भारतीय पक्राउ

काठमाडौं । काठमाडौंमा कबाडी संकलन गर्ने बहाना बनाएर दिउँसोको समयमा चोरी गरेको आरोपमा प्रहरीले पाँच जना भारतीयलाई पक्राउ गरेको छ ।

पक्राउ पर्नेमा भारतको समस्तीपुर जिल्ला मोहदीनगर घर भई हाल काठमाडौंको तिलगंगा बस्ने २६ वर्षीय लक्का भन्ने विकास पोदार, भारतको वेगुसरा जिल्ला बरौनी बस्ने वर्ष २८ को जितेन्द्र पोदार, भारतकै बैशाली जिल्ला बिहार बुधुपुरका २७ वर्षीय भाईलाल पोदार, भारत समस्तीपुर जिल्ला विध्यापती थानाका ४० वर्षीय संजय पोदार र भारत समस्तीपुरकै ५० वर्षीया मञ्जु देवी पोदार रहेका छन् ।

प्रहरीका अनुसार माघ २८ गते काठमाडौंको गोकणेश्वर नगरपालिका–४ माकलवारी स्थित दिलमाया आले मगरको घरबाट दिउँसोको समयमा कोही नभएको मौका पारी घरको ढोका फुटाई सुनका विभिन्न गरगहना तथा नगद गरी ६५ लाख बराबरको धनमाल चोरी भएको थियो ।

सो घटनामा संलग्न भारतीय नागरिक लक्का भन्ने विकास पोदार समेतलाई प्रहरीले बुधबार जडिबुटीबाट पक्राउ गरेको थियो ।

उनीसमेत संलग्न भई माघ २४ गते बूढानीलकण्ठ नगरपालिका–१० स्थित दिनेश घिमिरेको घरबाट सुन तथा नगद गरी २५ लाख बराबरको धनमाल र २८ गते गोकणेश्वर–३ गिता राईको घरबाट सुन तथा चाँदीका गर गहना तथा नगद समेत गरि अन्दाजी ४ लाख १० हजार बराबरको धनमाल समेत चोरी गरी लगेको अनुसन्धानका क्रममा खुलेको छ ।

सो कार्यमा संलग्न अन्य व्यक्तिहरूलाई समेत पक्राउ गरी थप अनुसन्धान तथा कारबाहीको लागि प्रहरी वृत, बौद्ध पठाइएको काठमाडौं उपत्यका अपराध अनुसन्धान कार्यालयले जनाएको छ ।

यो हेर्दा काठमाडौंमा कबाडी संकलन गर्ने व्यक्तिहरुसँग सजग हुनु पर्ने देखिएको छ । कबाडी संकलन गर्न आउनेसँग होसियार नहुँदा यस्तो घटना घटन सक्छ ।

कबाडी संकलन गर्ने व्यक्तिलाई आफ्नो घर भित्र पस्न दिन हुँदैन । यस्तो व्यक्तिले तपाईहरुको चिओ चासो गरिरहेका हुन्छन् । त्यसेले यस्ता व्यक्तिहरुबाट होसियार हुनुपर्छ ।