गृहमन्त्री रमेश लेखक भन्छन्– नेपाल प्रहरीको सङ्गठनात्मक संरचना चाँडै सुधार गरिन्छ

आर्थिक समृद्धि वर्तमान सरकारको मुख्य लक्ष्य

जनकपुरधाम । गृहमन्त्री रमेश लेखकले आर्थिक समृद्धि वर्तमान सरकारको मुख्य लक्ष्य भएको बताएका छन् ।

मुलुकमा राजनीतिक स्थायित्व, दिगो विकास, सुशासन प्रवर्द्धन तथा आर्थिक समृद्धि हासिल गर्ने लक्ष्यका साथ वर्तमान सरकार गठन भएको बताउँदै ती लक्ष्य पूरा गर्न राज्यका सबै संयन्त्रका साथै समाजका हरेक वर्गको सहयोग अपरिहार्य भएके बताएका हुन् ।

आज बिहीबार जनकपुर विमानस्थलमा पत्रकारहरूसँग कुराकानी गर्दै उनले वर्तमान सरकारका विकासका प्राथमिकताबारे जानकारी दिँदै निकट भविष्यमा नेपाल प्रहरीको सङ्गठनात्मक संरचना सुधारसम्बन्धी कानुन जारी हुने बताए ।

गृहमन्त्रीले भने, ‘नेपाल प्रहरीको ऐन ६९ वर्ष पुरानो भयो, यसमा सामयिक परिमार्जनक आवश्यक छ । नयाँ कानुन निर्माण तथा सङ्गठनात्मक क्षमता बढाएर प्रहरीलाई अझ व्यावसायिक बनाउनुपर्छ । नेपाल प्रहरीसम्बन्धी ऐन परिमार्जन गरेर बजेट व्यवस्थपनका निम्ति त्यो अर्थ मन्त्रालयमा पुगिसकेको छ ।’