सम्पत्ति शुद्धीकरण तथा आतंकवादमा वित्तीय लगानीविरूद्ध सन नेपाल लाइफकाे अभिमुखीकरण

काठमाडौं । सन नेपाल लाइफ इन्स्योरेन्सले आफ्ना बीमा अभिकर्ता तथा शाखा व्यवस्थापकहरूका लागि राष्ट्रियस्तरको एएमएल/सीएफटी (सम्पत्ति शुद्धीकरण र आतंकवादमा वित्तीय लगानी रोकथाम) अभिमुखीकरण कार्यक्रम सम्पन्न गरेको छ। उक्त कार्यक्रम माघ १८ गते काठमाडौंस्थित अमृतभोग क्याटरिङमा आयोजना गरिएको थियो, जसमा २०० भन्दा बढी अभिकर्ता र शाखा व्यवस्थापकहरूको उपस्थिति रहेको थियो।

कार्यक्रममा सन नेपाल लाइफका प्रमुख कार्यकारी अधिकृत (सीईओ) राजकुमार अर्यालले बीमा क्षेत्रमा बढ्दो प्रतिस्पर्धा, उद्योगका वर्तमान प्रवृत्तिहरू र व्यावसायिक नैतिकतासम्बन्धी मार्गदर्शन प्रदान गरेका थिए। साथै उनले सम्पत्ति शुद्धीकरण (एएमएल) तथा आतंकवादी क्रियाकलापमा वित्तीय लगानी रोकथाम (सीएफटी) सम्बन्धी नीतिहरू, नियमनकारी निकायहरूद्वारा लागू गरिएका नयाँ प्रावधानहरू, तथा बीमा प्रतिनिधिहरूले अवलम्बन गर्नुपर्ने नैतिक व्यापार अभ्यासहरूबारे महत्त्वपूर्ण जानकारी प्रस्तुत गरेका थिए।

सन नेपाल लाइफ इन्स्योरेन्सले आफ्ना सम्पूर्ण अभिकर्ता तथा शाखा व्यवस्थापकहरूलाई अद्यावधिक ज्ञान प्रदान गर्दै वित्तीय पारदर्शिता, नैतिक व्यापार अभ्यास तथा नियमकानुनको पालना गर्ने संस्कार विकास गर्ने प्रतिबद्धता जनाएको छ। बीमा व्यवसायमा पारदर्शिता तथा उत्तरदायित्व बढाउनका लागि यस्ता अभिमुखीकरण कार्यक्रमहरू आवश्यक छन् भन्ने संस्थाको विश्वास रहेको छ।