अष्ट्रेलियाका प्रधानमन्त्री अल्बानीजले गरे विवाह

काठमाडौँ । अष्ट्रेलियाका प्रधानमन्त्री एन्थोनी अल्बानीजले आफ्नी पार्टनर जोडी हेडेनसँग विवाह गरेका छन् । ६२ वर्षीय अल्बानीज प्रधानमन्त्री पदमा रहँदा विवाह गर्ने पहिलो अष्ट्रेलियाली प्रधानमन्त्री बनेका छन् ।

अल्बानीजले क्यानबेरास्थित प्रधानमन्त्री कार्यालयमा ४६ वर्षीया जोडी हेडेनसँग विवाह गरेका हुन् । जोडी वित्तीय सेवामा काम गर्छिन् । अल्बानीजको फेब्रुअरी २०२४ मा हेडेनसँग इन्गेजमेन्ट भएको थियो ।

अल्बानीज र हेडेनले सोमबारदेखि शुक्रबारसम्म अष्ट्रेलियामा आफ्नो हनिमून बिताउनेछन्, सम्पूर्ण खर्च बेहोर्नेछन्, जसको अर्थ उनीहरूले कुनै पनि सरकारी सहयोग पाउने छैनन् ।

यो अष्ट्रेलियाली अल्बानीजको दोस्रो विवाह हो । उनले २०१९ मा आफ्नी पूर्व पत्नी कार्मेल टेब्बटसँग सम्बन्ध विच्छेद गरेका थिए । यो विवाह १९ वर्ष टिकेको थियो। यस सम्बन्धबाट उनीहरूको छोरा नाथन छन् ।

२०२० मा मेलबर्नमा एक व्यावसायिक रात्रिभोजमा अल्बानीज र हेडेनको भेट भएको थियो । यो हेडेनको पनि दोस्रो विवाह हो, यद्यपि हेडेनको पहिलो विवाह र सम्बन्ध विच्छेदको विवरण सार्वजनिक रूपमा उपलब्ध छैन ।

लेबर पार्टीका नेता एन्थोनी अल्बानीजलाई उनको उपनाम ’अल्बो’ ले चिनिन्छ । एन्थोनीको जन्म मार्च २, १९६३ मा अष्ट्रेलियाको क्याम्परडाउन शहरको एक रूढिवादी क्याथोलिक परिवारमा भएको थियो । उनलाई उनकी आमाले हुर्काएकी थिइन् भने बुबाको बारेमा अनेकौ कथा रहेका छन् ।

उनले आफ्नी आमाको भावनालाई सम्मान गर्दै जीवित रहँदा कहिल्यै आफ्नो बुबालाई खोज्ने प्रयास गरेनन् । उनकी आमाको २००२ मा मृत्यु भएपछि आफ्नो बुबालाई इटालीमा भेटेको बताइन्छ । अष्ट्रेलियाको यातायात र पूर्वाधार मन्त्री बनेपछि, एन्थोनी बैठकमा भाग लिन इटाली गए । त्यहाँ, उनले आफ्नो गृहनगर बारलेटामा पहिलो पटक आफ्नो बुबालाई भेटेका थिए ।