काठमाडौं महानगर-२६ भित्र ७७ वटा सिसी क्यामरा फाइबर इन्ट्रानेटमा जडान

काठमाडौं । काठमाडौं महानगरपालिका-२६ ले ७७ वटा सिसी क्यामरालाई फाइवर इन्ट्रानेटमा जडान गरेको छ ।

कामपा-२६ ले नेपाल टेलिकमको सहकार्यमा बालाजु क्षेत्रबाट भित्र जडान गरिएका ७७ सिसी क्यामरालाई वडा कार्यालयमा राखिएको मोनिटरबाट हेर्न मिल्नेगरी फाइवर इन्ट्रानेटमा जडान गरेको हो ।

एक करोड लागतमा जडान गरिएको उक्त प्रणालीको आज काठमाडौँ महानगरपालिकाका प्रमुख प्रशासकीय अधिकृत सरोज गुरागाईं, नगर प्रवक्ता नवीन मानन्धर र कामपा–२६ का वडाअध्यक्ष ख्यामराज तिवारीले संयुक्त रूपमा शुभारम्भ गरे ।

कार्यक्रममा कामपा–२६ का वडाध्यक्ष तिवारीले उक्त प्रणालीलाई वडाभरी विस्तार गर्दै लैजाने बताए । “वडाभित्र २०० स्थानमा यस्ता क्यामरा जडान गर्नेछौँ, क्यामरा जडान भएसँगै सुरक्षित वडा निर्माणमा सहयोग पुग्नेछ”, उनले भने । सुरक्षा, सहरी विकास र विकास व्यवस्थापनका लागि प्रविधिको दिगो पूर्वाधार निर्माण गर्ने तथा सुरक्षा निकायसँग सहकार्य गर्ने योजना रहेको उनको भनाइ छ ।

महानगर सूचना प्रविधि विभागका प्रमुख अनिरुद्र नेपालले सहरभित्रका सीसीटिभी क्यामराबाट प्राप्त दृश्यको निगरानी गर्न बालाजु बाइसधारा उद्यान क्षेत्रमा सर्भलेन्स रुम (निगरानी कक्ष) निर्माणका लागि निर्माण पक्षसँग सम्झौता भइसकेको जानकारी दिए । आज सुरु भएको उक्त प्रणालीलाई महानगरका अन्य वडामा पनि विस्तार गर्दै लैजाने उनको भनाइ छ ।

नेपाल टेलिकमका उपप्रबन्धक इञ्जिनियर निर्मलराज चटौतले महानगरपालिकाले हरेक सिसीटिभी क्यामरालाई फाइबर सञ्जालमा जोडेर निगरानी कक्षमा लैजान आफूहरूसँग सहकार्य गरिरहेको बताए ।

बत्ती गए पनि यी क्यामरा चल्ने ब्याकअप पावरको व्यवस्था गरिएको छ । पिटीजेड (स्वचालित रूपमा दायाँबायाँ घुम्ने, तलमाथि सर्ने र जुम इन तथा जुम आउट हुने)’ क्यामेराले ५५० मिटरसम्म दूरीका दृश्यहरू स्पष्ट रूपमा खिच्न र कैद गर्न सक्छ । बुलेट क्यामराले ६० मिटरसम्मको स्पष्ट दृश्य दिन्छ ।