गगन थापा नेतृत्वको कांग्रेस केन्द्रीय समितिको पहिलो बैठक सुरू

काठमाडौँ । विशेष महाधिवेशनबाट छानिएको नेपाली काँग्रेसको नयाँ कार्यसमितिको बैठक सुरू भएको छ ।

केन्द्रीय समितिको बैठक ललितपुरको कुपण्डोलस्थित एक पार्टी प्यालेसमा शुरु भएको छ ।

गएराती घोषणा भएको केन्द्रीय समितिको बैठक आज शुरु भएको हो । शेरबहादुर देउवा पक्षको विरोधका बाबजुत गएराती विशेष महाधिवेशन सम्पन्न भएपछि अब आधिकारिक काँग्रेस कुन समुह हो भन्ने विवाद बढ्ने देखिएको छ ।

विशेष महाधिवेशनबाट आएको गगन थापा नेतृत्वको काँग्रेसले आज केन्द्रीय समितिको बैठकपछि निर्वाचन आयोगमा पार्टी अध्यावधिक गर्न निवेदन दिने बताइएको छ ।

यसअघि विशेष महाधिवेशन पक्षले बन्दसत्रमा कार्यवधि पारित हुनासाथ निर्वाचन आयोगलाई जानकारी दिएको थियो भने बुधबार देउवा पक्षले केन्द्रीय समितिको बैठक राखेर तत्कालिन महामन्त्रीद्वय गगन थापा र विश्वप्रकाश शर्मा तथा सहमहामन्त्री फरमुल्लाह मन्सुरलाई पाँच बर्षका लागि पार्टीबाट निष्काशित गरेको थियो । अब अध्यावधिकको निवेदन गएपछि निर्वाचन आयोगले काँग्रेसको आधिकारिकता बारे निर्णय गर्ने छ ।