बुधबार, कात्तिक ४, २०८३
कर्पोरट खबर
3:14 pm, बुधबार, कात्तिक ४, २०८३
काठमाडौं । अमेरिकी अर्बपति एलन मस्कले आफूले नेतृत्व गर्दै आएका स्पेसएक्स र टेस्लालाई गाभ्ने सम्भावित प्रस्तावप्रति समर्थन जनाएका छन् । दुवै कम्पनीबीच एकीकरणको सम्भावनाबारे अध्ययन भइरहेका बेला स्पेसएक्सले पछिल्लो त्रैमासिक अवधिमा उल्लेख्य नाफा कमाएको छ ।
जुलाईदेखि सेप्टेम्बरसम्मको अवधिमा स्पेसएक्सले ४ अर्ब ४० करोड अमेरिकी डलर खुद नाफा कमाएको छ । अघिल्लो वर्षको सोही अवधिमा कम्पनीले १ अर्ब १० करोड डलर घाटा बेहोरेको थियो । यस अवधिमा कम्पनीको आम्दानी १६१ प्रतिशतले बढेर १४ अर्ब ६० करोड डलर पुगेको छ ।
मस्कका अनुसार दुवै कम्पनीका स्वतन्त्र सञ्चालकहरूको विशेष समितिले सम्भावित गाभ्ने प्रक्रियाबारे अध्ययन गरिरहेको छ । स्वार्थको द्वन्द्व हुन सक्ने भएकाले आफू उक्त छलफलमा सहभागी हुन नसक्ने उनले बताएका छन् । यद्यपि, कम्पनी गाभ्ने सम्झौता निश्चित भइसकेको छैन । यसका लागि टेस्लाका सेयरधनीको व्यापक समर्थन आवश्यक पर्ने उनको भनाइ छ ।
स्पेसएक्सको नाफा बढ्नुमा कृत्रिम बुद्धिमत्ता (एआई) सेवा र कम्प्युटिङ क्षमता भाडामा दिने सम्झौताले महत्त्वपूर्ण योगदान पुर्याएको कम्पनीले जनाएको छ । कम्पनीको एआई एकाइको आम्दानी नौ गुणाले बढेर ७ अर्ब ६० करोड डलर पुगेको छ ।
एआई पूर्वाधार विस्तारलाई तीव्रता दिइरहेको स्पेसएक्सले सन् २०२७ मा थप १० गिगावाट कम्प्युटिङ क्षमता सञ्चालनमा ल्याउने लक्ष्य राखेको छ । मस्कले यस क्षेत्रमा ठूलो लगानी गर्ने योजना अघि सारेका छन् ।
यसैबीच, स्पेसएक्सको स्याटेलाइट इन्टरनेट सेवा स्टारलिङ्कको आम्दानी पनि ६९ प्रतिशतले बढेर ५ अर्ब २० करोड डलर पुगेको छ । कम्पनीका अनुसार स्टारलिङ्कका ग्राहकको सङ्ख्या १ करोड ३६ लाख पुगेको छ ।
अन्तरिक्ष प्रविधिमा पनि स्पेसएक्सले प्रगति गरिरहेको छ । कम्पनीले मङ्गल ग्रहमा भविष्यमा गरिने अभियानका लागि महत्त्वपूर्ण मानिएको स्टारसिप रकेटमार्फत आम्दानी दिने पहिलो उडानसमेत पूरा गरेको जनाएको छ । उक्त उडानबाट नयाँ पुस्ताका २६ वटा स्टारलिङ्क उपग्रह पृथ्वीको कक्षमा पुर्याइएको थियो ।
