विश्वकप फाइनलमा अर्जेन्टिना किन हार्यो ? यस्ता छन् ५ मुख्य कारण

काठमाडौं । विश्व फुटबलको नयाँ राजा बनेको छ स्पेन।

अतिरिक्त समयमा गरिएको एक मात्र गोलको मद्दतले स्पेनले अर्जेन्टिनालाई १–० ले पराजित गर्दै फिफा विश्वकप–२०२६ को उपाधि जितेको हो। १६ वर्षपछि फेरि विश्वकप जितेको स्पेनका लागि फेरान टोरेसले अतिरिक्त समयको १०६औँ मिनेटमा गरेको गोल नै निर्णायक बन्यो।

निर्धारित ९० मिनेटसम्म दुवै टोली गोलरहित बराबरीमा रोकिए पनि अतिरिक्त समयमा स्पेनले आफ्नो दबाबलाई गोलमा परिणत गर्‍यो। निको विलियम्सको हेडरबाट आएको बललाई फेरान टोरेसले नजिकैबाट शक्तिशाली प्रहार गर्दै जाली चुमाए। अर्जेन्टिनाका गोलकिपर एमिलियानो मार्टिनेजले धेरै प्रयास गरे पनि त्यो प्रहार रोक्न सकेनन्।

खेलको अन्त्यतिर अर्जेन्टिनालाई ठूलो धक्का लाग्यो। दोस्रो पहेँलो कार्ड पाएपछि एन्जो फर्नान्डेज मैदानबाट बाहिरिए र अर्जेन्टिना १० खेलाडीमा सीमित भयो। त्यसपछि स्पेनले संख्यात्मक फाइदाको पूरा उपयोग गर्दै निर्णायक गोल निकाल्न सफल भयो।

खेलभरि स्पेनले बलमाथि नियन्त्रण कायम राख्दै लगातार आक्रमण गरिरह्यो। लामिन यमाल, मिकेल ओयारजाबाल र निको विलियम्सले अर्जेन्टिनाको रक्षापंक्तिलाई निरन्तर दबाबमा राखे। अर्कोतर्फ अर्जेन्टिनाले अधिकांश समय रक्षात्मक रणनीति अपनायो र आक्रमणमा अपेक्षित प्रभाव देखाउन सकेन।

यद्यपि अर्जेन्टिनाका गोलकिपर एमिलियानो मार्टिनेज टोलीका सबैभन्दा उत्कृष्ट खेलाडी बने। उनले निर्धारित समय र अतिरिक्त समयमा समेत धेरै उत्कृष्ट बचाउ गर्दै खेललाई लामो समयसम्म बराबरीमा राखे। तर अन्ततः स्पेनको लगातार दबाब थेग्न नसक्दा अर्जेन्टिनाले उपाधि गुमायो।

बहुप्रतीक्षित फाइनल खेल भने अपेक्षाअनुसार रोमाञ्चक बन्न सकेन। बारम्बार खेल रोकिँदा र शारीरिक प्रतिस्पर्धा बढ्दा खेलको लय प्रभावित भएको विश्लेषकहरूको भनाइ छ।

मैदानबाहिर भने विश्वकपको माहोल निकै भव्य देखियो। अमेरिकाका राष्ट्रपति डोनाल्ड ट्रम्प फाइनल हेर्न उपस्थित भएका थिए भने मध्यान्तरमा सकिरा, म्याडोना र जस्टिन बिबरले प्रस्तुति दिएका कारण हाफ–टाइम सामान्य १५ मिनेटको सट्टा करिब २७ मिनेटसम्म लम्बिएको थियो।

अर्जेन्टिना किन हार्यो ?

१. मेस्सीमाथि अत्यधिक निर्भरता

प्रतियोगिताभरि उत्कृष्ट प्रदर्शन गरेका कप्तान लियोनेल मेस्सीलाई स्पेनले फाइनलमा प्रभावहीन बनायो। कडा मार्किङका कारण उनले आफ्नो स्वाभाविक खेल देखाउन सकेनन्। गोल गर्ने वा निर्णायक पास दिने अवसरसमेत उनले सिर्जना गर्न सकेनन्।

२. अत्यधिक रक्षात्मक रणनीति

अर्जेन्टिनाले आफ्नो आक्रामक शैलीभन्दा पनि स्पेनको खेल बिगार्ने रणनीति अपनायो। जसका कारण टोलीले बलमाथि नियन्त्रण गुमायो र निरन्तर दबाब खेप्न बाध्य भयो।

३. स्पेनको मिडफिल्डको दबदबा

रोड्री, पेड्री र अन्य मिडफिल्डरहरूले खेलको गति आफ्नो नियन्त्रणमा राखे। स्पेनले लामो समय बल कब्जामा राख्दा अर्जेन्टिनाले आफ्नो लय नै समात्न सकेन।

४. एन्जो फर्नान्डेजको रातो कार्ड

दोस्रो पहेँलो कार्ड पाएर एन्जो बाहिरिएपछि अर्जेन्टिना १० खेलाडीमा सीमित भयो। यही अवस्थाको फाइदा उठाउँदै स्पेनले अतिरिक्त समयमा विजयी गोल गर्‍यो।

५. उत्कृष्ट टोली प्रदर्शन

स्पेनसँग कुनै एक सुपरस्टारमा निर्भर रहने अवस्था थिएन। प्रत्येक खेलाडीले आफ्नो जिम्मेवारी उत्कृष्ट रूपमा निभाए। प्रशिक्षक लुइस डे ला फुएन्टेको रणनीति, अनुशासन र टोलीको एकताले स्पेनलाई विश्व फुटबलको सर्वोच्च स्थानमा पुर्‍यायो।

स्पेनले रच्यो इतिहास

यो जितसँगै स्पेनले दोस्रोपटक पुरुष विश्वकपको उपाधि जितेको छ। साथै पुरुष र महिला दुवै विश्वकप जित्ने पहिलो राष्ट्र बनेर स्पेनले विश्व फुटबलमा नयाँ इतिहास पनि रचेको छ।