आइतबार, भदौ १४, २०८३
कर्पोरट खबर
8:00 pm, आइतबार, भदौ १४, २०८३
काठमाडौं । अन्तर्राष्ट्रिय क्रिकेट परिषद (आइसीसी) ले सन् २०२७ मा हुने पहिलो महिला च्याम्पियन्स ट्रफीको आयोजना अधिकार श्रीलङ्काबाट खोसेको जनाइएको छ ।
श्रीलङ्का क्रिकेटको सञ्चालनमा सरकारले नियुक्त गरेको अन्तरिम प्रशासन रहेका कारण प्रतियोगिता आयोजना गर्न आईसीसीले असहमति जनाएको बताइएको छ ।
पहिलो महिला च्याम्पियन्स ट्रफी सन् २०२७ फेब्रुअरी १४ देखि २८ गतेसम्म हुने तय भएको छ । प्रतियोगितामा ६ टोली सहभागी हुनेछन् । श्रीलङ्कालाई यस ऐतिहासिक प्रतियोगिताको आयोजक तोकिएको भए पनि क्रिकेट बोर्डमा सरकारी हस्तक्षेपसम्बन्धी आईसीसीको नीतिका कारण आयोजना अधिकार हटाइएको बताइएको छ ।
श्रीलङ्का क्रिकेटको अन्तरिम प्रशासनका सचिव प्रकाश शैफ्टरले पनि प्रतियोगिता श्रीलङ्काबाट अन्यत्र सारिएको पुष्टि गरेका छन्। नयाँ आयोजकको टुङ्गो भने लागिनसकेको उनले बताएका छन् ।
आईसीसीले यसअघि श्रीलङ्का क्रिकेटमा चाँडो निर्वाचन गर्न आग्रह गरेको थियो । आईसीसी बोर्ड बैठकमा श्रीलङ्का क्रिकेटको अवस्थाबारे छलफल गर्दै क्रिकेट बोर्डमा सरकारी हस्तक्षेप नहुने सुनिश्चित गर्नुपर्नेमा जोड दिइएको थियो ।
आयोजना अधिकार गुमाएपछि श्रीलङ्काको महिला टोलीको प्रतियोगितामा सहभागितासमेत अन्योलमा परेको छ । प्रतियोगितामा आईसीसी वरियताका शीर्ष पाँच टोली छनोट हुने र आयोजक राष्ट्रले छैटौँ टोलीका रूपमा स्थान पाउने व्यवस्था छ। हाल श्रीलङ्काको महिला टोली वरियतामा छैटौँ स्थानमा रहेकाले आयोजना अधिकार गुमाएमा उसको सहभागिताको बाटो कठिन बन्न सक्छ ।
नयाँ आयोजकबारे निर्णय आगामी आईसीसी बोर्ड बैठकबाट हुने बताइएको छ । पहिलो महिला च्याम्पियन्स ट्रफी महिला क्रिकेटको विश्वव्यापी विकासका दृष्टिले महत्वपूर्ण प्रतियोगिता मानिएको छ ।
