ह्वाट्सएप बिजनेस एपीआईमार्फत नेपाली व्यवसायलाई नयाँ अवसर

काठमाडौं । रमेश कर्पअन्तर्गतको टेली डिजिटल सर्भिसेस प्रा.लि.ले मेटासँगको सहकार्यमा ‘द कन्भरफरेन्स’ नामक विशेष कार्यक्रम आयोजना गरेको छ ।

नेपाली व्यवसायलाई संवादात्मक व्यापार अर्थात् ‘कन्भर्सेशनल कमर्स’ को सम्भावना तथा ह्वाट्सएप बिजनेस एपीआईको उपयोगबारे जानकारी गराउने उद्देश्यले आयोजित उक्त कार्यक्रममा नेपालका विभिन्न कर्पोरेट क्षेत्रका व्यवसायिक नेतृत्वकर्ता, ब्रान्ड मार्केटर तथा डिजिटल निर्णयकर्ताको उल्लेखनीय सहभागिता रहेको थियो ।

नेपालको डिजिटल क्षेत्रमा महत्त्वपूर्ण उपलब्धिका रूपमा हेरिएको कार्यक्रममा मेटाका एपीएसी क्षेत्रीय साझेदारी प्रबन्धक अल्बर्ट टियोङले मुख्य वक्ताका रूपमा सम्बोधन गरेका थिए । उनले नेपाललाई संवादात्मक व्यापारका लागि उदाउँदो तथा रणनीतिक रूपमा महत्त्वपूर्ण बजारका रूपमा मेटाले प्राथमिकतामा राखेको उल्लेख गरे ।

ह्वाट्सएप बिजनेस एपीआईमार्फत ग्राहक सेवा, लिड जेनेरेसन, बिक्री रूपान्तरण, ग्राहक टिकाइ राख्ने रणनीति तथा व्यक्तिगत स्तरको संवादलाई कसरी प्रभावकारी बनाउन सकिन्छ भन्ने विषयमा विस्तृत छलफल गरिएको थियो ।

त्यसैगरी कार्यक्रममा विश्वव्यापी व्यवसायिक म्यासेजिङ प्रवृत्तिबारे जानकारी दिँदै मेटाका म्यासेजिङ प्लेटफर्ममा प्रत्येक साता एक अर्बभन्दा बढी मानिस व्यवसायसँग जोडिने तथ्य प्रस्तुत गरिएको थियो । नेपालमा ह्वाट्सएपको व्यापक प्रयोग भइरहेका कारण नेपाली व्यवसायले एसएमएस र इमेलजस्ता परम्परागत माध्यमभन्दा बाहिर गएर प्रत्यक्ष, विश्वासिलो तथा मापनयोग्य ग्राहक संवादको अवसर उपयोग गर्न सक्ने विषयमा विशेष जोड दिइएको थियो ।

कार्यक्रममा बोल्दै अल्बर्ट टियोङले नेपाल व्यवसायिक म्यासेजिङका लागि उत्साहजनक चरणमा पुगेको बताए । उनले ह्वाट्सएप बिजनेस प्लेटफर्म ठमेलको सानो पारिवारिक पसलदेखि राष्ट्रिय बैंकसम्म सबै प्रकारका व्यवसायका लागि उपयोगी रहेको उल्लेख गर्दै नेपाली ब्रान्डले अब ग्राहकसँगको संवादलाई अझ व्यक्तिगत र प्रभावकारी बनाउन सक्ने धारणा व्यक्त गरे ।

रमेश कर्पका कार्यकारी निर्देशक सञ्जय अग्रवालले पाँच दशकभन्दा बढी समयदेखि रमेश कर्प नेपाली व्यवसायको वृद्धि र प्रगतिमा साझेदार बनेको बताए । उनले टेली डिजिटलमार्फत नेपाली व्यवसायहरूलाई स्थानीय सहयोग, स्थानीय भुक्तानी सुविधा तथा विश्वस्तरीय डिजिटल प्लेटफर्ममा सहज पहुँच उपलब्ध गराउने लक्ष्य रहेको उल्लेख गरे ।

टेली डिजिटल सर्भिसेस प्रा.लिका प्रमुख कार्यकारी अधिकृत नवांकुर सुदले अहिलेको डिजिटल युगमा ग्राहकसँग जबर्जस्ती बिक्रीभन्दा संवादमार्फत सम्बन्ध निर्माण गर्नु आवश्यक रहेको बताए । उनले ग्राहक–केन्द्रित डिजिटल इकोसिस्टम निर्माणमा कम्पनी केन्द्रित रहेको उल्लेख गर्दै ह्वाट्सएप बिजनेस एपीआईले नेपाली व्यवसायलाई ग्राहक जहाँ छन् त्यहीँ पुगेर व्यक्तिगत अनुभूति हुने संवाद गर्न सक्षम बनाउने धारणा राखे ।

टेली डिजिटल सर्भिसेस प्रा.लि. रमेश कर्पअन्तर्गत सञ्चालनमा रहेको संस्था हो । कम्पनी गुगल, मेटा तथा ह्वाट्सएपको आधिकारिक साझेदारका रूपमा कार्यरत छ । कम्पनीले नेपाली व्यवसायलाई गुगल एड्स, मेटा एड्स, गुगल वर्कस्पेस तथा ह्वाट्सएप बिजनेस एपीआई सेवा स्थानीय भुक्तानी सुविधा, स्थानीय विशेषज्ञता, तत्काल विज्ञापन क्रेडिट तथा नेपालमै उपलब्ध समर्पित सेवासहित उपलब्ध गराउँदै आएको जनाएको छ ।

रमेश कर्पको पाँच दशकभन्दा लामो अनुभव र विश्वासलाई आधार बनाउँदै टेली डिजिटलले नेपाली व्यवसायहरूलाई बिचौलिया, विदेशी भुक्तानी जटिलता तथा सञ्चालनसम्बन्धी अवरोधबिना विश्वस्तरीय डिजिटल प्रविधिमा पहुँच दिलाउने कार्यलाई निरन्तर अघि बढाइरहेको जनाएको छ ।