विदेशमा बसेका नेपालीलाई उतैबाट भोट हाल्न पाउने व्यवस्था गरिनेछ : प्रधानमन्त्री प्रचण्ड

काठमाडौँ । प्रधानमन्त्री पुष्पकमल दाहाल ‘प्रचण्ड’ले प्रवासमा रहेका नेपालीहरुलाई बसेकै देशबाट भोट हाल्न पाउने व्यवस्था गरिने बताएका छन्।

नेकपा माओवादी केन्द्र प्रवास समन्वय समितिद्वारा आयोजित भर्चुअल कार्यक्रमलाई शुक्रबार राति सम्बोधन गर्दै उनले प्रवासी नेपालीलाई उनीहरु रहेकै ठाउँबाट मताधिकार प्रयोग गर्न पाउने व्यवस्था मिलाइने बताएका हुन्।

उनले भने, ‘यसबाट लाखौं प्रवासी नेपाली लाभान्वित हुनेछन् र मताधिकारबाट वञ्चित हुनुपर्दैन।’

विदेशमा रहेका नेपालीले पठाएको रेमिटेन्सबाट विदेशी मुद्राको सञ्चितिमा उत्साह थपेको जनाउँदै वैदेशिक रोजगारी सुधारका लागि सरकारले धेरै काम गरिसकेको दाबी गर्दै प्रधानमन्त्रीले अझै थप काम गर्ने प्रतिबद्धता जनाए।

उनले भने, ‘वैदेशिक रोजगारीबाट प्राप्त रेमिटेन्सले विदेशी मुद्रा सञ्चिति ११ महिनालाई पुग्ने संकलन हुनु आफैंमा अर्थतन्त्र सुधारको संकेत हो।’

उनले सामाजिक सुरक्षा कोषमा प्रवासी नेपालीको आवद्धता श्रमिकको सुरक्षा भएको बताए।

उनले राज्यका सबै निकायलाई राम्रोसँग परिचालन गरेर राजस्वमा उल्लेख्य सुधार भएको उल्लेख गर्दै आफू प्रधानमन्त्री बनेपछि सार्वजनिक सहकारी र निजी क्षेत्रको समन्वयलाई अगाडि बढाउन र निजी क्षेत्रलाई आर्थिक विकास निर्माणमा परिचालन गर्न जोड दिएको बताए।

उनले भने, ‘संविधान निर्माण गर्ने र देशलाई अहिलेको अवस्थामा ल्याउने प्रमुख शक्ति माओवादी हो। हामीलाई विकासको गति पैदा गर्ने र रोजगारी ग्यारेन्टी गर्ने चुनौती छ।

अर्थतन्त्रमा परेको अफ्ठ्यारो अहिलेको होइन, पहिलेदेखि नै हो। यसमा म आएपछि सुधार भइरहेको छ।’