प्राधिकरणले स्वीकार्‍यो लोडसेडिङ, भन्यो– १५ दिनसम्म विदुयुत माग धान्न मुस्किल

काठमाडौं । नेपाल विद्युत् प्राधिकरणका कार्यकारी निर्देशक कुलमान घिसिङले सुख्खा याममा बिजुली उत्पादन नहुँदा लोडसेडिङ भएको बताएका छन् ।

देशभरका उद्योगी व्यवसायीले लोडसेडिङ बढेको गुनासो गर्न थालेपछि घिसिङले पत्रकार सम्मेलनको आयोजना गरेर सुख्खा यामका कारण पावर सप्लाइमा समस्या आएको बताएका हुन् ।

घिसिङले यसपटकको सुख्खा याममा हिउँ नपर्दा हिउँ पग्लिनुपर्ने समय सुख्खा याममा परिणत भएको बताए ।

पुस माघ महिनामा हिमाली क्षेत्रमा उच्च मात्रामा हिउँ पर्नुपर्ने हो । तर, उक्त समयमा हिउँ नपर्दा यति बेला हिउँ पग्लेर नदिको तह बढ्नुपर्ने समयमा बिजुलीको उत्पादन घटेको प्राधिकरणले जानकारी दिएको छ ।

यस्तै पानी पर्नुपर्नेमा पानी समेत नपरेपछि वीरगन्ज र बिराटरनगर लगायतका क्षेत्रमा सञ्चालित उद्योगमा लोडसेडिङ भएको घिसिङले बताए ।

‘अहिले विराटनगर र वीरगन्ज क्षेत्रका उद्योगीलाई बिहान र बेलुकाको समयमा मात्र चलाउनु भनेको हो,’ घिसिङले भने, ‘तर गत वर्षको तुलनामा अहिले कम समस्या छ ।’

गत वर्ष भारतबाट बिजुली ल्याउने संयन्त्र कमजोर हुँदा थप समस्या आएको थियो ।

घिसिङले अबको १५ दिनसम्म नेपालको माग धान्न मुस्किल परेको बताए ।

उनले भने, ‘अबको १५ दिनपछि प्रि मनसुन सुरु हुन्छ । तराईमा सिँचाइ गर्न पर्दैन । यस्तै नदी नालाको पानीको बहाव समेत बढ्छ ।’

यहिकारण अबको १५ दिनपछि निर्यात कसरी गर्ने भन्नेमा प्राधिकरण चिन्तित रहेको घिसिङको भनाई छ ।