भ्रष्टाचार नगर्ने, नसहने र गर्न नदिने दोहोर्‍याउँदै प्रधानमन्त्रीले भने– जुनसुकै कालखण्डको भ्रष्टाचारको छानविन हुन्छ

काठमाडौं । प्रधानमन्त्री केपी शर्मा ओलीले जुनसुकै कालखण्डमा भएका भ्रष्टाचार र अनियमितताको छानविन गरी दोषीउपर कारबाही गरिने बताएका छन् ।

प्रतिनिधिसभामा आज विश्वासको मत माग्ने क्रममा प्रधानमन्त्री ओलीले ‘भ्रष्टाचार गर्दैनौँ, भ्रष्टाचार सहँदैनौँ, कसैलाई भ्रष्टाचार गर्न दिँदैनौँ’ भन्ने आफ्नो स्पष्ट अडान दोहोर्‍याउँदै भ्रष्टाचार र अख्तियारको दुरुपयोगसँग जोडिएको विषयमा अनुसन्धान हुने बताएका हुन् ।

कुनै कालखण्डमा भएको भ्रष्टाचार र जोकोही भ्रष्टाचारी उपर कानूनी कारबाही अघि बढाउने विश्वास व्यक्त गर्दै उनले सुशासनका पक्षमा आफ्नो नेतृत्वको सरकार दृढताका साथ अगाडि बढ्ने स्पष्ट पारे ।

भ्रष्टाचारी एकदिन कानुनको कठघरामा पुग्ने विश्वास समाजमा स्थापित गराइने प्रधानमन्त्री ओलीको भनाइ थियो । सरकारले सहकारी पीडितका सन्दर्भमा उचित निर्णय लिने र सहकारी ठगलाई कानुनको कठघरामा उभ्याएरै छाड्ने उनले प्रतिबद्धता व्यक्त गरे ।

भ्रष्टाचारी एक दनि कानूनको कठघरमा पुग्छन् भन्ने स्थापति गराउने भन्दै ओलीले सहकारी ठगलाई पनि कारबाही गर्ने विश्वास व्यक्त गरेका छन् ।