स्वदेशी उत्पादनलाई प्रोत्साहन गर्न सिर्जनशील उद्यमी मेला सुरु

 

काठमाडौं ।  मुलुकमा आयात न्यूनीकरण गरी स्वदेशी उत्पादनलाई प्रोत्साहन गर्ने उद्देश्यले सिर्जनशील उद्यमी मेला आजदेखि सुरु गरिएको छ ।

सिर्जनशील उद्यमी महिला केन्द्रद्वारा बालुवाटारस्थित आम्रपाली परिसरमा आयोजित मेलामा घरेलु तथा हस्तकला समग्री, कृषि उत्पादन, लत्ताकपडा, शृङ्गार सामग्री प्रदर्शनका साथै बिक्रीसमेत गरिएको हो । मेला आइतबारसम्म चल्नेछ ।

बागमती प्रदेशका सामाजिक विकासमन्त्री हरिप्रभा खड्गीले मेला उद्घाटनका क्रममा मुलुकमा आयात प्रतिस्थापन गर्न घरेलु तथा साना उद्योगको प्रवर्द्धन गर्नुपर्नेमा जोड दिए। उनले हस्तकला तथा घरेलु उद्योगबाट हुने उत्पादनले रोजगारी सिर्जना गर्नाका साथै ग्रामीण अर्थव्यवस्थालाई गतिशील बनाउने बताए ।

स्वदेशी उत्पादनलाई स्वदेशमै खपत गर्नसकेमा त्यसले पूँजी परिचालनको वातावरण बनाउन सहयोग पुग्ने बताउँदै मन्त्री खड्कीले सामाजिक रुपान्तरणमा मद्दत पुग्ने विश्वास व्यक्त गर े।

आहा रेडियो नेटवर्कका अध्यक्ष हेमचन्द्र सुवेदीले मुलुकमा आर्थिक विकासका लागि औद्योगिकीकरणको खाँचो औँल्याउँदै कुटिर उद्योगको विकासले ग्रामीण अर्थतन्त्रलाई समृद्ध बनाएर समग्र मुलुकको अर्थतन्त्रलाई सकारात्मक प्रभाव पार्ने बताए ।

केन्द्रका अध्यक्ष मिलु थापाले महिला वर्गलाई व्यावसायिक सीपको विकास गर्न सकेमा उनीहरूको परिवारको सामाजिक तथा आर्थिक रुपान्तरण हुने बताउँदै स्वदेशी उत्पादनलाई बढावा दिन प्रदर्शनी गरिएको जानकारी दिए ।