पर्यटन जनशक्तिलाई सशक्त बनाउने कार्यक्रमको सुरुवात

काठमाडौं । नेपाल पर्यटन व्यवसायीहरूको आगामी पुस्तालाई बर्तमानसँग अभ्यस्त गराउने उद्देश्यले नेपाल पर्यटन बोर्डले पर्यटन जनशक्तिलाई सशक्त बनाउने कार्यक्रमको सुरुवात गरेको छ । सोमबार नेपाल पर्यटनबोर्डमा भएको कार्यक्रममा ‘भविष्यमा पर्यटन जनशक्तिलाई कसरी प्रभावकारी बनाउने’ भन्ने विषयमा छलफल भएको हो ।

पहिलो दिन शुभश्री कलेज अफ म्यानेजमेन्टको ब्याचलर अफ होटल म्यानेजमेन्ट कार्यक्रमका ६५ विद्यार्थीहरू सहभागी थिए। नेपाल पर्यटन बोर्डका कार्यकारी प्रमुख दीपकराज जोशीले कार्यक्रमको महत्वलाई जोड दिँदै भने ‘यो हाम्रो पर्यटनको भविष्य प्रवर्द्धन गर्ने पहल हो। यस क्रममा भाइबहिनी रउद्योगीहरूको साथको अपेक्षा गर्दछौं।’
कार्यक्रममा बोल्दै बोर्डका वरिष्ठ निर्देशक हिकमत सिंह ऐरले यो कार्यक्रमले बिद्यार्थी भाइबहिनीहरूलाई जागिर उन्मुख हुने भन्दा पनि उद्यमी बन्न जोड लगाउनुपर्ने बताए। बोर्डका वरिष्ठ प्रवन्धक विमल कँडेलले नेपालका अनुपम पर्यटकीय सम्पदाहरुको बारेमा प्रस्तुतिकरण गरेका थिए ।

यसै गरी कार्यक्रममा सुभश्री कलेजका प्राचार्य मनिता ओलीले युवा जनशक्तिले हरेक समय केही न केही सिकिरहनु पर्ने र यस कार्यक्रमले पनि सबैलाई सिक्ने मौका दिएको बताए । सहभागी हुन चाहने अन्य कलेज, शैक्षिक संस्थाहरूले यस कार्यक्रममा संलग्न हुनको लागि पर्यटन सम्पदा तथा संसाधन विकास महाशाखाको पर्यटन क्षमता बिकास एकाइमा सम्पर्क गर्नुपर्ने हुन्छ । “यो पहल ज्ञान हस्तान्तरणको लागि मात्र होइन, यो हाम्रो पर्यटन उद्योगको भविष्यलाई आकार दिने युवा नेताहरू बनाउने अभियान हो,“ श्री जोशीले थपे नेपाल पर्यटन बोर्ड नेपालमा दिगो पर्यटन प्रवद्र्धन गर्न र प्रमुख पर्यटन गन्तव्यको रूपमा देशको छवि बढाउन प्रतिबद्ध छ। नवीन कार्यक्रमहरू र साझेदारीहरू मार्फत, बोर्डले पर्यटन उद्योगको विकासलाई दीर्घकालीन सुनिश्चित गर्ने लक्ष्य राखेको छ।