चुलियो सार्वजनिक ऋण, प्रतिव्यक्तिको थाप्लोमा ८६ हजार ऋणको भार

चालु आर्थिक वर्षको तीन महिनामा मात्र ८८ अर्ब ९३ करोड रुपियाँ ऋण थप

काठमाडाैँ। नेपालको सार्वजनिक ऋणको आकार २५ खर्ब २३ अर्ब नाघेको छ । सार्वजनिक ऋण व्यवस्थापन कार्यालयले सार्वजनिक गरेको चालु आर्थिक वर्षको पहिलो त्रैमाससम्मको रिपोर्ट अनुसार मुलुकले तिर्न बाँकी ऋण २५ खर्ब २३ अर्ब ३ करोड ९३ लाख रुपियाँ पुगेको हो । कार्यालयका अनुसार चालु आर्थिक वर्षको तीन महिनामा मात्र ८८ अर्ब ९३ करोड रुपियाँ ऋण थपिएको छ । २०८१ असार मसान्तसम्ममा मुलुकको तिर्न बाँकी ऋणको आकार २४ खर्ब ३४ अर्ब ९ करोड रुपैयाँ रहेको थियो ।

समीक्षा अवधिमा भूक्तान बाँकी कूल ऋणमध्ये आन्तरिकतर्फ १२ खर्ब ३६ अर्ब ३० करोड रुपैयाँ अर्थात् ४९ प्रतिशत रहेको छ भने बाह्यतर्फ १२ खर्ब ८६ अर्ब ७३ करोड (५१ प्रतिशत) रहेको छ । असोज मसान्तसम्म कायम कूल तिर्न बाँकी सार्वजनिक ऋणको आकार कूल गार्हस्थ्य उत्पादन (जीडीपी) को तुलनामा ४४.२३ प्रतिशत रहेको छ । ​यदी कूल तिर्न बाँकी ऋणलाई कूल जनसंख्याले भाग गर्ने हो भने प्रतिव्यक्तिको थाप्लोमा ८६ हजार ७ सय रुपियाँ बढी पर्ने स्थिति छ ।

चालु आर्थिक वर्षमा आन्तरिक र बाह्य गरी कूल ५ खर्ब ४७ अर्ब रुपैयाँ ऋण परिचालन गर्ने लक्ष्य राखेकोमा असोज मसान्तसम्म एक खर्ब ३६ अर्ब ३२ करोड रुपियाँ प्राप्त गरिएको सार्वजनिक ऋण व्यवस्थापन कार्यालयले जनाएको छ । यो कूल लक्ष्यको जम्मा २४.९२ प्रतिशतको उपलब्धी हो ।