एक सातापछि देशभर चिसो बढ्ने सम्भावना

काठमाडौं । एक सातापछि काठमाडौं उपत्यकालगायत देशभर चिसो बढ्ने सम्भावना रहेको छ ।

जलवायु तथा विपद् व्यवस्थापनविद् डा. धर्मराज उप्रेतीले नोभेम्बर ९ पछि ३ डिग्री सेल्सियससम्म तापक्रम घटेर चिसो बढ्ने बताएका छन् ।

‘भारतको मौसम विज्ञान विभागले नै अब नोभेम्भर ९ तारिकपछि चिसो बढ्ने सम्भावना रहेको पूर्वानुमान गरेको छ,’ उनले भने, ‘कहिले छिटो त कहिले ढिलो गरी चिसो सुरू हुन्छ, समान्यतया कात्तिकको अन्तिममा यहाँ पनि चिसो बढ्न सुरू हुन्छ।’

शुक्रबार रातिसम्म काठमाडौको न्यूनतम तापक्रम १६ डिग्री सेल्सियस रहेको छ ।

जल तथा मौसम विज्ञान विभाग, मौसम पूर्वानुमान महाशाखाका अनुसार आज पनि मुलुकका केही स्थानमा हल्का वर्षासमेत भएकाले चिसो सुरू भएको छ ।

चिसोयाम सुरू भएपछि मानिसलाई दम, रूघाखोकी, ज्वरोलगायत समस्या उब्जने तथा चिसोको समयमा विभिन्न रोगका जिवाणु हावामा लामो समयसम्म बाँच्न सक्ने भएकाले सतर्कता अपनाउन जनस्वास्थ्यविद्हरूले सुझाव दिएका छन् ।