कास्की जिल्ला अदालतमा रविको बयान सुरु

काठमाडाैँ । सहकारी ठगी, सङ्गठित अपराध र सम्पत्ति शुद्धीकरणको मुद्दामा कास्की प्रहरी हिरासतमा रहेका रास्वपा सभापति रवि लामिछानेको बयान सुरु भएको छ । पोखराको सूर्यदर्शन सहकारीको रकम अपचलन आरोपमा प्रहरीले अनुसन्धान प्रतिवेदन जिल्ला सरकारी वकिल कार्यालयमा बुझाएपछि सरकारी वकिल कार्यालयले आइतबार अभियोग पत्र अदालतमा दर्ता गरेको थियो । तर अन्य प्रतिवादीको बयान भइरहेका कारण लामिछानेको बयान रोकिएपनि आज भने उनको बयान सुरु भएको हो ।

जिल्ला सरकारी वकिल कार्यालय कास्कीले रवि लामिछानेविरुद्ध सहकारी ठगीमा ३ करोड ३७ लाख रुपैयाँ बिगो कायम गर्दै मुद्दा दर्ता गरेको छ ।

सहकारीको रकम गोर्खा मिडियामा आउनुमा सङ्गठित रुपमा जिबी राईसँग मिलेर काम गरेको भन्दै रविसहितका प्रतिवादी विरुद्ध सङ्गठित अपराध गरेको आरोप लगाइएको छ । सङ्गठित अपराध गरेर सम्पत्ति शुद्धिकरण गरिएको भन्दै लामिछानेको हकमा २७ करोड ८९ लाख ४४ हजार ७०५ रुपैयाँ नै बिगो कायम गरिएको छ । सो मुद्दाको थुनछेक बहसअघि अदालतमा प्रतिवादीहरुको बयान चलिरहेको छ । कास्की अदालतले यसअघि नै सोही कसुरमा छविलाल जोशी र लिला पछाईको बयान लिएको छ ।