म माथी ठूलो अन्याय भएको छ, अहिले नै गिरफ्तारी दिँदैछुः रवि लामिछाने

काठमाडौं । रास्वपाका सभापति रवि लामिछानेले अदालतको आदेशको सम्मान गर्दै आफूले आजै गिरफ्तारी दिन लागेको जानकारी गराएका छन् । सामाजिक सञ्जाल फेसबुकमार्फत उनले आफूले गिरफ्तारी दिन लागेको जानकारी गराएका हुन् ।

उनले आफूमाथि ठुलो अन्याय भएको पनि गुनासो गरेका छन् । ‘सम्मानित अदालतको आदेशको सम्मान गर्दै म आफै आजै अहिले नै गिरफ्तारी दिँदै छु। साथै न्यायालयका अन्य ढोकाहरू मेरा लागि खुला होलान् नै । न्यायका लागि दुनियाँका सबै ढोका ढकढकाउँछु । म माथि ठुलो अन्याय भएको छ’, उनले भनेका छन् ।

आज उच्च अदालत तुलसीपुरको बुटवल इजलासले सुप्रिम बचत तथा ऋण सहकारी ठगी प्रकरणमा लामिछानेलाई पुर्पक्षका लागि थुनामा पठाउने आदेश दिएको छ । न्यायाधीश रमेश ढकाल र स्वीकृति पराजुलीको संयुक्त इजलासले सहकारी ठगी सम्बन्धी कसुर र संगठित अपराधसम्बन्धी मुद्दामा धरौटीमा रिहा गर्ने जिल्ला अदालतको आदेश उल्ट्याएको हो ।