संसद् चलाउन एमाले हठ बाधक

काठमाडौँ । प्रमुख प्रतिपक्षी नेकपा एमालेले प्रधानमन्त्री शेरबहादुर देउवाले बिहीबार बिहान बोलाएको सर्वदलीय बैठक बहिष्कार गरेको छ।

संघीय संसद्को बैठक सञ्चालनमा एमालेले खडा गरेको अवरोध हटाउन छलफलका लागि प्रधानमन्त्रीले सर्वदलीय बैठक बोलाएका हुन्। बैठक सहजरूपमा सञ्चालन गर्न संसदीय व्यवस्था मन्त्रीमार्फत गरेको पहल सार्थक नभएपछि प्रधानमन्त्री देउवाले निकास खोज्न सर्वदलीय बैठक बोलाए पनि सत्ताबाट बाहिरिनुपरेको कुण्ठा र आक्रोशका कारण एमाले अनुपस्थित भयो।

आफ्नै पार्टीका कारण साढे दुई महिनाअघि सत्ताच्युत भएका एमाले अध्यक्ष केपी शर्मा ओली संघीय संसद्लाई भूमिकाविहीन बनाउन सक्रिय छन्। प्रधानमन्त्री हुँदा पनि उनले दुईपटक प्रतिनिधिसभा विघटन गरेका थिए। उनको कदमलाई दुईपटक नै सर्वोच्च अदालत अवैध ठहर गर्दै प्रतिनिधिसभा पुनस्र्थापना गरेको थियो। ओली अहिले पनि संसद् चल्न नदिने रणनीतिमा छन्।

पार्टीका असन्तुष्ट १४ सांसदलाई पदमुक्त गर्न गरिएको सिफारिस सभामुखले कार्यान्वयनमा नल्याएको भन्दै एमालेले संसद् चल्न दिएको छैन। सत्ताबाट बाहिरिनुपरेको आक्रोश एमालेले संसद् बैठक चल्न नदिएर पोखेको कांग्रेसका एक नेताले बताए। ‘माधव नेपालसहित १४ जनालाई कारबाही गरिएन भन्ने एमालेको बहानामात्र हो,’ ती नेताले भने, ‘पाँच वर्ष ढुक्कले सत्तामा बसिन्छ भन्ने थियो। तर उहाँहरू आफ्नै कारणले सत्ताच्युत हुनुभयो। त्यसको आक्रोश पूर्वप्रधानमन्त्री ओलीमा देखिन्छ।’

ओलीकै कारण अहिले कांग्रेस नेतृत्वमा सरकार गठन हुने अवस्था आएको भन्दै ती नेताले भने, ‘ओलीमा सत्ताबाट बाहिरिनुपरेको आक्रोश हुनु अस्वाभाविक होइन। तर यो अवस्था ओलीकै कारणले आएको हो।’ मेरो विकल्प मैमात्र हो भन्ने ओली प्रतिपक्षमा पुग्दा आक्रोशित र उत्तेजित भएको ती नेताले बताए।

वार्ता र छलफल बहिष्कार लोकतान्त्रिक शासन व्यवस्थामा सुहाउने कुरा होइन । कांग्रेस केन्द्रीय सदस्य प्रदीप पौडेलले प्रधानमन्त्रीले बोलाएको सर्वदलीय बैठक बहिष्कार गरेर एमालेले समस्याको निकास नचाहेको आरोप लगाए । ‘सर्वदलीय बैठक बहिष्कार गर्ने, संसद् बैठकमा अवरोध गर्ने, छलफलमै नबस्ने हठले राजनीतिक गतिरोध अन्त्य हुँदैन,’ पौडेलले भने, ‘म नै सर्वज्ञानी, मेरै मात्र कुरा ठीक भन्ने भ्रमबाट मुक्त भएर संसद्बाट निकास खोज्नु बुद्धिमत्ता हुन्छ।’ विगतमा पनि ओलीले पटकपटक संसद् विघटन गरेका प्रति संकेत गर्दै उनले थपे, ‘संसद्को सर्वोच्चता स्विकार्ने नेतृत्वले मात्रै लोकतन्त्रको रक्षा गर्न सक्छ।’

संसद्को अवरोध हटाउन ओलीसँग निरन्तर छलफलमा रहेका कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले प्रमुख प्रतिपक्षी दल संवादबाट भाग्न खोजेको बताएको आजको नागरिक दैनिकमा समाचार छ ।