एनआईसी एशिया बैंकद्वारा क्युआर मर्चेन्ट एक्टिभेसन योजना सार्वजनिक

काठमाडौं । एनआईसी एशिया बैंकले क्युआर मर्चेन्ट एक्टिभेसन योजना सार्वजनिक गरेको छ । बैंकले डिजिटल भुक्तानीलाई थप विस्तार र प्रोत्साहन गर्न क्युआर कोडमार्फत भुक्तानी लिने मर्चेन्टहरूलाई विभिन्न आकर्षक सुविधा सहितको क्युआर मर्चेन्ट एक्टिभेसन योजना सार्वजनिक गरेको हो ।

डिजिटल च्यानलबाट हुने भुक्तानीलाई बढी भन्दाबढी सेवाग्राहीहरू समक्ष पुयाउने हेतुले बैंकले ल्याएको यो योजना आषाढ मसान्तसम्म सञ्चालन हुनेछ भने उक्त समयभित्र पहिलोपटक भुक्तानी लिने मर्चेन्टहरू मात्र यस योजनामा समावेश हुनेछन् ।

देशभर २ लाखभन्दा बढी मर्चेन्टहरूमाझ उपस्थिती जनाइसकेको बैंकले क्युआर भुक्तानीलाई प्रोत्साहन गर्न विभिन्न कम्पनीहरूसँगको समझदारीमा पहिलो पटक कारोबार गर्ने मर्चेन्टहरूलाई सम्बन्धित साझेदार कम्पनीहरू मार्फत आकर्षक लाभको व्यवस्था गरेको छ ।

यस योजना अनुसार यति एयरलाइन्सको तर्फबाट एक जोडीलाई माउन्टेन फ्लाइट टिकट, काठमाडौं सुपरमार्केटको तर्फबाट २ हजार बराबरका १० वटा ह्याम्पर, ट्रिकल इन्डष्ट्रिजको तर्फबाट ५–५ हजार बराबरको १०० वटा भौचर, हार्ड रक क्याफेको तर्फबाट १० वटा नन भेज बीबीक्यु को भौचर, बिग डिजिटलको तर्फबाट एक–एक थान राइस कुकर, ब्रेक फास्ट मेकर तथा ह्याण्ड ब्लेडर र सिजी डिजिटलको तर्फबाट एक–एक थान मिक्चर ग्रिन्डर, इन्डक्सन कुकर तथा ड्राई आइरनको व्यवस्था गरिएको छ ।

साथै, बैंकले ट्रयाङक्वीलिटी स्पाको तर्फबाट ५० वटा भौचर, अगेनो सेकुवाको तर्फबाट एक–एक हजारका ४ वटा भौचर, हुकुट स्टोरको तर्फबाट ६ वटा घडी एवं २ वटा इयरबड, कुटुम्ब होटलको तर्फबाट दुई–दुई हजारका ५ वटा भौचर, अपटाउन रेष्टुरेन्टको तर्फबाट १५–१५ सय बराबरको ५ वटा भौचर र स्क्वायर होटलको तर्फबाट दुई–दुई हजारका ३ वटा भौचर प्रदान गर्नेछ ।

यसरी उपलब्ध फाइदाहरु बैंकले २०० मर्चेन्टहरूलाई निजहरुको कारोबार रकम र कारोबार संख्याका आधारमा छनौट गर्नेछ भने समझदारी प्रदान गरेका कम्पनीहरूले हस्तान्तरण गर्नेछन् । यसै योजना अनुसार यस बैंकले राखेको फोनपे क्युआर कोडमार्फत असार मसान्तसम्ममा पहिलो क्युआर भुक्तानी लिने सम्पूर्ण मर्चेन्टहरूले एक पटक वा पटक पटक गरी रु। २०० भन्दा माथिको भुक्तानी लिँदा कुल रु। १०० क्यासब्याक प्राप्त गर्न सकिने छ ।

बैंकको क्युआर मर्चेन्ट बन्न चाहनुहुने इच्छुक व्यवसायी तथा कम्पनीहरूले बैंकको वेबसाइट भित्र एम्लाई लाउ आइकनमा ट्याप गरी उपलब्ध विकल्पहरूमध्ये बी अ मर्चेन्टबाट अनलाईन आवेदन दिन सक्नेछन् ।